Suspeitu NSXP (faru metan) no JMP (faru riskadu) durante prosesu investigasaun iha Eskuadra Polísia Uatucarbau. Imajen/Espesiál

DILI, 30 juñu 2021 (TATOLI)–Komandu Jerál Polísia Nasionál Timor-Leste (PNTL) munisípiu Viqueque no Servisu Informasaun Polísia (SIP) ohin detein ona suspeitu joven mane ida ho inisiál NSXP, ho idade 19, hosi postu administrativu Uatucarbau, ne’ebé sunu bandeira Portugal, iha ninia hela fatin.

Detensaun ne’e hafoin parte SIP buka tuir suspeitu ninia paradeiru liuhosi vídio ho durasaun 00:14, ne’ebé públika hosi suspeitu ho inisiál JMP ho idade 21, iha rede sosiál no sai virál.

“Suspeitu ida ho inisiál NNXP, daudaun ne’e detein ona hodi halo prosesu investigasaun,” Portavós PNTL, Superintendente Xefe, Arnaldo de Araújo, informa ba Agência TATOLI, via telefónika, kuarta (30/06).

Notísia relevante: PNTL buka-tuir autór sunu bandeira Portugál

Suspeitu sunu baindeira Portugal iha tuku 4:00 madrugada iha loron 28 juñu, hafoin asiste jogu UEFA EURO 2020, ne’ebé ekipa Portugal lakon ho Bélgika ho eskore 0-1.

Portavós Komandu Jerál PNTL, haktuir, daudaun ne’e ekipa hosi munisípiu Viqueque lidera hosi Segundu Komandante munisípiu inklui SIP Viqueque bolu ona suspeitu na’in-rua ba Eskuadra Polísia Uatucarbau hodi halo prosesu investigasaun durante oras 72 nia laran hodi aprezenta kazu ne’e ba Ministériu Públiku hodi prosesa ba Tribunál Baucau.

“PNTL konsidera asaun sunu baindeira nu’udar krime no sei prosesa, tanba suspeitu mós hasai liafuan la edukativu durante halo asaun sunu baindeira,” Superintendente Xefe, Arnaldo de Araújo subliña.

Iha investigasaun, suspeitu rekoñese sunu bandeira no halo asaun ne’e tanba nu’udar adeptus Portugal maibé lamenta tanba lakon durante hasoru Bélgika.

 Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here