Ema deskoñesidu sunu Bandeira Portugál. Imajen Facebook.

DILI, 28 juñu 2021 (TATOLI)—Polísia Nasionál Timor Leste (PNTL), munisipiu Dili orienta ona Serbisu Informasaun Polísia (SIP), hodi buka-tuir suspeitu ne’ebé envolve iha kazu sunu bandeira Portugál, no oras-ne’e virál iha média sosiál.

Segundu Komandante PNTL, munisípiu Dili, Superintendente Polísia, Euclides Belo konsidera asaun ne’e nu’udár krime tanba estraga símbolu nasaun ida nian ne’ebé tenki prosesa tuir lei.

Notísia relevante:Adeptu futeból tenke respeita bandeira hosi kualkér nasaun

“SIP espalla ona atu buka hatene fatin akontesimentu no buka deskobre suspeitu,” Euclides Belo hateten ba jornalista Agência Tatoli, via WhatsApp segunda ne’e.

Asaun sunu bandeira Portugál ne’ebé virál iha média sosiál ho durasaun vídio 00:14, akontese iha tuku 4:00 madrugada, deskonfia autór ne’e hanesan joven balun iha Dili laran, hafoin ekipa selesaun Portugál lakon ho Bélgica 0-1, iha tasa Euro 2020.

PNTL deskonfia ona, suspeitu ne’ebé halo asaun ne’e hela iha munisípiu Dili, maibé seidauk identifika loloos rezidénsia.

Iha vídio ne’e, autór ne’ebé hanesan adeptu futeból ba ekipa hosi Portugál, hasai mós liafuan ne’ebé la merese.

Lere kondena makaas aktu ne’e

Iha sorin seluk, Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál, Lere Anan Timur, kondena makaas aktu ne’ebé joven balun sunu bandeira nasaun Portugál nian.

“Ida-ne’e krime, ne’e kestaun soberania nasaun ida-nian. Polísia tenki toma responsabilidade lalais, tanba ita-nia relasaun diplomátika ho Portugál di’ak tebes. Labele sunu ema nia bandeira, bainhira ema seluk sunu ita-nia Bandeira, ita sempre foti kestaun, tanba bandeira ne’e ita sosa ho raan,” Lere Anan Timur, hateten ba jornalista-sira liuhosi konferénsia imprensa iha Kuartél Jenerál F-FDTL, Fatuhada, segunda ne’e.

Líder másimu instituisaun Defeza ne’e apela ba sidadaun hotu atu respeita nafatin símbolu hosi kualkér nasaun no husu atu hahalok ne’ebé agora espalla iha média sosiál labele repete tan iha nasaun ne’e.

Jornalista: Eugénio Pereira

Editór: Cipriano Colo

1 KOMENTÁRIU

  1. Sente laran moras fali bainhira hare husi media Joven sira sunu bandeira Portugal nee, nee hahalok ida nbe mal edukadu liu.
    Husu ba Nai Ulun sira atu toma atensaun maka’as mai ami Joven foin sa’e sira iha rai doben Timor Leste ne’e, hodi nune’e ami bele hatudu hahalok nebe mak Edukadu ba Mundo,

HAKEREK NO HATÁN

Please enter your comment!
Please enter your name here