Prezidente Repúblika, Francisco Guterres Lú Olo, Prezide Reuniaun Konsellu Estadu iha Palásiu Prezidente Nicolau Lobato, Bairru Pite, Dili, segunda, (28/06). Imajen Tatoli /Egas Cristovão

DILI, 28 juñu 2021 (TATOLI)–Konsellu Estadu (KE) no Konsellu Superiór Defeza no Seguransa (KSDS), segunda ne’e hala’o reuniaun ho Prezidente Repúblika, Francisco Guterres Lú Olo, hodi diskute kona-ba renovasaun estadu emerjénsia ne’ebé realiza iha Palásiu Prezidensiál Nicolau Lobato, Bairru Pite, Dili.

Notísia Relevante: Prezidente Repúblika dekreta Estadu Emerjénsia ba dala-XIV

Xefe Kaza Sivíl Prezidénsia Repúblika, Francisco Maria de Vasconcelos, hateten Konsellu Estadu no Konsellu Superiór Defeza no Seguransa ho unanimidade rekomenda ba Prezidente Repúblika Francisco Guterres “Lú Olo” atu haruka karta ba Parlamentu Nasionál hodi halo estensaun ba Estadu Emerjénsia ba dala-XV.

“Ha’u hakarak informa katak Konsellu Superiór Defeza no Seguransa no Konsellu Estadu hato’o pedidu ba Prezidente Repúblika husu ba Parlamentu Nasionál atu renova estadu emerjénsia ba dala XV,” Xefe Kaza Sivíl Prezidénsia Repúblika, Francisco Maria de Vasconcelos hateten ba jornalista sira, segunda ne’e.

Medida estadu emerjénsia, nia dehan, hanesan nafatin maibé konsiderasaun boot liu mak agora daudaun vírus Delta komesa espalla ona iha Idnonézia, tanba ne’e mak Governu halo pedidu ba Prezidente Repúblika. 

Pedidu Governu atu estende estadu emerjénsia (EE) ne’e, bazea ba dadus hosi Sentru Integradu Jestaun Krize (SIJK) ne’ebe iha domingu (26/06) ne’e, rejista kazu pozitivu 56, rekoperadu 30 no kazu ativu 838 no kazu konfirmadu komulativu sura hosi 21 marsu 2020 to’o 28 juñu 2021 hamutuk 9.035.

Membru Konsellu Superiór Defeza no Seguransa ne’ebé partisipa iha reuniaun ne’e mak hanesan Prezidente Repúblika (PR) Francisco Guterres Lú Olo, Primeiru-Ministru (PM) Taur Matan Ruak, Ministra Negósiu Estranjeiru no Kooperasaun (MNEK) Adaljiza Albertina Xavier Reis Magno, Ministru Defeza no Ministru Interiór interinu Filomeno da Paixão de Jesus, Ministru Justisa (MJ) Manuel Carceres. Hosi Parlamentu Nasionál, David Dias Ximenes, Abel Pires da Silva, Xefe Estadu Maiór Jenerál FALINTIL Forsa Defeza Timor Leste (F- FDTL), Tenente Jenerál Lere Anan Timur, Komandante Jerál Polisia Nasionál Timor-Leste Komisáriu Faustino da Costa, no Diretór Ezekutivu Forum Organizasaun Naun Governamentál (FONGTIL) Daniel Santos do Carmo.

Entretantu, membru Konsellu Estadu ne’ebé partisipa iha reuniaun ne’e mak atuál Xefe Estadu) Francisco Guterres Lú Olo, Primeiru- Ministru (PM) Taur Matan Ruak, Eis Prezidente Repúblika José Manuel Ramos Horta, Prezidente Parlamentu Nasionál Aniceto Guterres Lopes, membru ne’ebé nomea hosi Prezidente Repúblika mak hanesan Prezidente Kámara Komérsiu Indústria (CCI- TL-sigla portugés) Oscar Lima, Prezidente Komisaun Nasionál Eleisaun (CNE-sigla portugés) Alcino de Araújo Barris, no nomea hosi Parlamentu Nasionál mak hanesan Aurora Ximenes, José Cornelio Guterres, Arcánjelo de Jesus Gouveia Leite, no José dos Santos (Naimori Bukar).

Dadus atuál kazu COVID-19 iha Nusa Tenggara Timur (NTT) daudaun ne’e hamutuk 18.279, no totál kazu iha Indonézia to’o iha loron 26 fulan-juñu ne’e, iha kazu hamutuk tokon 2.09, rekoperadu tokon 1.84, mate tokon 56.729, no dadus mundiál ba COVID-19 ne’e iha kazu hamutuk tokon 181, rekoperadu 0, no mate tokon 3,92.

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here