Autoridade saúde konvida ema hotu liu hosi panfletu atu partisipa másimu hodi simu vasina. Imajen Tatoli/Sérgio da Cruz.

BOBONARO, 07 juñu (TATOLI)—Diretór Serbisu Saúde Munisípiu Bobonaro, João Barreto Cardoso, hateten oras ne’e daudaun, munisípiu ne’e preparadu atu simu vasina COVID-19 ho tipu AstraZeneca ba doze daruak iha fulan ne’e.

João Barreto Cardoso esplika, planu micro ne’ebe parte saúde prepara ona maka, vasina doze daruak sei oferese ba ema na’in 5000-resin inklui pesoál liña frente 1.239 ne’ebé simu ona doze dahuluk hamutuk ho sira ne’ebé idade 60 ba leten.

Notísia relevante:Vasina iha Bobonaro remata ho pesoál liña frente 1.292

“Doze daruak ne’e ita sei fó ba ema 5000-resin tuir tarjetu no llanu micro ne’ebé ita iha, ho doze dahuluk ba ema ho idade 60 no mós sira ne’ebé moras,’’ João Barreto Cardoso, hateten ba Tatoli  iha edifísiu Serbisu Saúde munisípiu Bobonaro, segunda ne’e.

Serbisu Saúde Munisípiu Bobonaro remata ona vasina AstraZeneca ba pesoál liña frente 1.239 iha kinta 22 abríl tinan ne’e no tuir planu Ministériu Saúde (MS), sei distribui vasina doze daruak ba munisípiu hotu-hotu iha semana oin.

João Barreto Cardoso husu ba populasaun iha munisípiu ne’e atu hakbesik an ba simu vasina iha Sentru Vasinasaun ne’ebe estabelese ona iha suku, nun’e bele aumenta imunidade kontra COVID-19.

Ekipa saúde munisipál kontinua halo sensibilizasaun kona-bá prevensaun COVID-19 no kampaña vasina AstraZeneca iha suku inklui anunsia iha Rádio Komunidade Maliana.

Problema ne’ebé ekipa enfrenta mak hanesan rekursu umanu, materiál lojéstika, ekipamentu protesaun pesoál hanesan máskara, luvas no seluk tan.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here