Logotipu SAMES. Imajen/Espesiál

DILI, 30 juñu 2021 (TATOLI)—Ministériu Saúde (MS) liu hosi Divizaun Fundu Globál sei apoia rekursu umanu atu bele reforsa jestaun armazenamentu no lojístika  iha Serbisu Autónomu Medikamentu no Ekipamentu Saúde (SAMES).

Apoiu ne’e, formaliza liu hosi asina akordu kooperasaun ne’ebé hala’o iha edifísiu SAMES Kampung Alor, kuarta ne’e.

Notísia relevante:Japaun oferese karreta malirin ida ba SAMES

“Ami asina akordu ne’e atu apoia hodi rekruta funsionáriu ida mai iha SAMES, nune’e bele hala’o kna’ar no responsabilidade, tau-matan ba jestaun armazen, nune’e mós  asegura redusaun ba programa TBC, HIV no Malária,’’ Administradór Divizaun Fundu Globál  Ministériu Saúde, Noé Gaspár Pinto da Silva hateten ba jornalista, hafoin asina akordu.

Noé Gaspár Pinto da Silva rekoñese katak, durante ne’e rukursu umanu ba programa tolu ne’e limitadu no presija tebes atu tau-matan ba ai-moruk ne’ebé utiliza ba tratamentu moras tolu ne’e.

Iha fatin hanesan, Diretór Ezekutivu SAMES, Santana Martins, hateten durante ne’e enfrenta duni difikuldade kona-bá rekursu umanu atu fó apoiu ba jestaun programa tolu ne’ebé konsideradu hanesan moras ho númeru aas iha rai ne’e.

Tanba ne’e, ho akordu ne’ebé estabelese ohin, bele tulun di’ak liu tán SAMES atu bele jere di’ak liu tan armezén no lojístika, liuliu ai-moruk sira  ne’ebé espesifikamente indikadu ba programa prevensaun moras tolu mensionadu.

Santana Martins mós hatutan, la’ós apoiu de’it iha rekursu umanu, maibé apoiu rekursu seluk ne’ebé sei estabelese iha tempu badak liga ba haforsa sistema armazenamentu rejionál inklui trasporte atu mobiliza kontentór-sira.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here