Serbisu Autónomu Medikamentu no Ekipamentu Saúde (SAMES) hetan apoiu kareta malirin ka (Refrigerated Vehicle no Cold Box) hosi Japan Intenasional Cooperation Agency (JICA), Iha SAMES, kuarta (30/06). Imajen Tatoli/Francisco Sony.

DILI, 30 juñu 2021 (TATOLI)—Governu Japaun liuhosi Japan International Cooperation Agency (JICA) oferese karreta malirin (refrigerated vehicle) unidade ida ho cold box hamutuk 15 ba Serbisu Autónomu Medikamentu no Ekipamentu Saúde (SAMES), atu apoia serbisu prevensaun COVID-19 iha Timor-Leste (TL).

Vise Ministru Saúde, Bonifácio ‘Maucoli dos Reis’ hein katak, ho apoiu hosi Governu Japaun liuhosi JICA bele asegura vasina sira to’o iha Sentru Saúde no Postu Saúde-sira iha Timor laran tomak ho seguru.

Notísia relevante:JICA apoiu ekipamentu IT ba Sentru Izolamentu Vera Krús

”Ita-nia populasaun 80% mak seidauk hetan vasina. Entaun, ho ajudu ida-ne’e ita bele garante katak, vasina sira sei transporta duni ba to’o iha Sentru Saúde no postu Saúde-sira ho seguru,” Bonifácio Maucoli dos Reis, hateten iha edifísiu SAMES Kampung Alor, kuarta ne’e.

Nune’e mós Diretór Ezekutivu SAMES, Santana Martins agradese ba parseiru-sira ne’ebé oferese ona apoiu hirak-ne’e, liuliu Governu Japaun liuhosi JICA, no hein katak sei bele fasilita diak liu tan serbisu prevensaun COVID-19 iha rai ne’e.

”Karreta malirin ne’e sei uza atu tula vasina no mós cold box 15 atu reponde ba iha nesesidade liu liu hatama vial ka frasku vasina COVID-19,” Santana Martins, hateten.

Xefe reprezentativu JICA iha TL, Goto Ko, hateten JICA koko hela atu bele supporta Governu TL, liuhosi dalan oi-oin, dalan ida ne’ebé simples liu bele halo maka husu ba alumni JICA-sira iha instituisaun Governu nian, atu fahe no kontribui matenek ne’ebé hetan durante treinamentu iha Japaun ba sira-nia serbisu fatin.

Alende ne’e, JICA hanesan doadór sei kontribui bazeia ba saida mak importante atu hadi’a, liuhosi programa JICA maka Follow-up Cooperation.

Goto Ko konsidera ida-ne’e la’ós kontribuisaun ikus hosi JICA, maibé sei kontinua to’o ema hotu-hotu seguru, JICA sei fo tulun nafatin  ho kapasidade ne’ebé iha.

Orsamentu ne’ebé JICA preve hodi sosa karreta malirin ida no cold box sanulu resin lima ne’e, hamutuk $100.000.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here