Logotipu FFTL no Bandeira RDTL. Imajen/FFTL

DILI, 30 juñu 2021 (TATOLI) – Federasaun Futeból Timor -Leste (FFTL) kondena maka’as aktu sidadaun Timor balun ne’ebé sunu bandeira Portugál bainhira selesaun Portugál derrota 0-1 ho Belgia iha Euro 202, foin lalais ne’e.

Notísia Relevante : PNTL buka-tuir autór sunu bandeira Portugál

“Atitude ne’ebé sunu bandeira nasaun ne’ebé sira fó apoiu tanba de’it  kestaun lakon, ida ne’e la’ós étika. Iha mundu bola nian labele hanesan ne’e, problema ba ita mak ne’e, ema ne’e laiha koñesimentu ba ánimu futeból nian,” Sekretaria Jerál FFTL, Nelio Isaac Sarmento, hateten ba Agência Tatoli iha edifísiu FFTL Dili, kuarta ne’e.

Nelio Isaac Sarmento  hanesan bola mania ida sente la di’ak haree situasaun ne’e no aktu ladi’ak hosi indivíduu ida nian bele fó impaktu ladi’ak ba relasaun amizade Portugál ho Timor-Leste.

“Bola ne’e reprezenta nasaun, hanesan ita karik aban bairua ita joga mak lakon ho nasaun seluk mak nasaun seluk halo fali nune’e mai ita mós ita sente laran moras. Ne’ebé bola labele halo hanesan ne’e, tanba bola ne’e lori dame la’ós lori fali hahalok sira hanesan ne’e,”  eis Sekretaria Estadu Juventude no Desportu (SEJD) ne’e tenik.

Nelio Isaac nu’udar mós eis Sekretaria Estadu Komunikasaun Sosiál (SEKOMS)  husu ba timoroan hotu bele fanátiku ba nasaun saida de’it, maibé kuandu lakon tenke simu realidade. Labele ba estraga ema nia sasán no nasaun seluk nia atributu.

Jornalista       : Hortencio Sanche

Editór              : Francisco Simões

HAKEREK NO HATÁN

Please enter your comment!
Please enter your name here