DILI, 30 juñu 2021 (TATOLI) – Dirijente ba eskola-sira ne’ebé atu sai eskola referénsia tenke sai jestór di’ak.
Notísia Relevante : MEDJ sei transforma ESJ no ESTV balun sai eskola referénsia
Daudaun ne’e, Ministru Edukasaun, Juventude no Desportu (MEJD) deside ona eskola tolu iha Dili laran nu’udar kandidatu ba eskola referénsia. Eskola sira ne’e maka hanesan eskola Ensinu Sekundáriu Jerál (ESJ) 12 novembru, Eskola ESJ 4 setembru UNAMET ho Eskola Tékniku Vokasionál Grupu Teknolojia Indústria, Becora, Dili.
Diretór Jerál Ensinu Sekundáriu Tékniku Vokasionál (ESTV), Deolindo da Cruz, hateten jestaun ne’ebé presiza sai atensaun maka oinsá dirijente sira utiliza meius iha eskola hodi dezenvolve progresu eskola nian.
Nia informa, eskola tolu ne’ebé MEJD deside atu sai referénsia tenke halo daudaun ona preparasaun oinsá atu iha planu no programa ida di’ak hodi jere atividade iha eskola refere no gaña konfiansa MEJD nian atu hetan apoiu iha futuru.
Ba Agência Tatoli iha nia servisu fatin, Dili, Deolindo da Cruz, hateten atu sai eskola referénsia la’ós fasil, maibé Governu hakarak fó kompeténsia bá dirijente eskola-sira atu jere jestaun iha ida-idak nia eskola. Atu haree sira-nia kapasidade oinsá bele lidera hodi halo planu no programa eskola nian.
Jornalista : Tomé Amado
Editór : Francisco Simões
