Pesoál Saúde prepara vasina Sinovac iha UNTL, tersa (29/06). Imajen Tatoli/Francisco Sony.

DILI, 29 juñu 2021 (TATOLI)—Sala Situasaun, Sentru Integradu Jestaun Krize (SIJK), rejista kazu óbitu bebé ida, pozitivu 63, rekoperadu 73 no kazu ativu 790.

“Óbitu ne’ebé relata ohin bebé mane ida, idade fulan hitu, hela iha suku Bahamori, postu administrativu Venilale, munisípiu Baucau. Inan-aman detetadu pozitivu asintomátiku, iha 21 Juñu,’’ Koordenadór Forsa-Tarefa ba Prevensaun no Mitigasaun, Rui Maria de Araújo, hateten liuhosi komunikadu, tersa ne’e.

Notísia relevante:COVID-19: pozitivu 20, rekoperadu 57 no ativu 801

Iha 23 juñu bebé hahú isin manas no me’ar, maibé ninia rezultadu PCR negativu.  Tanba bebé ne’e tama kritériu kontaktu-besik hosi inan-aman ne’ebé pozitivu, iha 25 juñu repete teste PCR. Teste daruak ne’e hatudu rezultadu pozitivu ho cycle threshold (CT) N2gene 26,7, Egene 25,3.

Médiku-sira iha Hospital Referénsia Eduardo Ximenes Baucau, desidi refere mai iha Vera Cruz, ho dignoze traballu bronchopneuonia.

Hahú 26 juñu ninia kondisaun deterioriza, no iha 28 juñu iis-kotu iha Vera Cruz, ho sindroma insufisiénsia respiratória aguda (SIRA), ka susar ka difísil atu dada-iis, tanba COVID-19.

“Familia koordena ona ho ekipa saúde atu hala’o funerál tuir protokolu ne’ebé adopta iha Timor-Leste,’’ Rui Maria de Araújo, hateten.

Kazu foun ohin rejista 63, hosi Dili 42 no munisípiu-sira iha 21, kompostu hosi mane na’in 39 no feto 24.

Hosi totál kazu detetadu foun ohin, ho idade 12 mai karaik  na’in-ida, entre tinan 12-59 na’in 62 (86,9%), idade 60 mai karaik  laiha no 3% sintomátiku.

Kumulativu kazu konfirmadu sura hosi 21 marsu 2020 to’o 29 juñu 2021 hamutuk 9118. Hosi horisehik mai ohin, teste ne’ebé Laboratóriu Nasionál Saúde halo hamutuk 779 PCR, ho detallu hanesan tuir-mai, Vijilánsia sentinela 33, rastreiu ba kontaktu ka Contact tracing 29, Rastreiu Aleatóriu ka Random Screening 138, Viájen sai-hosi serka sanitária hosi Dili 540, Viájen internasionál  30, Follow up iha kuarentena sia.

Totál testes PCR ne’ebé halo iha 28 juñu iha munisípiu-sira seluk, RAEOA no HNGV hamutuk 469 ho  detalla hanesan tuir-mai, Maubisse 69, Maliana 29, Viqueque 32, Suai 94, Baucau 96, Ermera 98, RAEOA  26 no HNGV 25.

Atu bele hatene surtu ida ninia evolusaun nomós surtu ne’e aumenta ka diminui, indikadór seluk ne’ebé matenek-na’in epidemiolojia-nian uza, maka insidénsia.

Konvensionalmente, insidénsia sukat totál kazu foun kada loron pur mil abitante, no hatudu risku ne’ebé populasaun iha atu hetan da’et moras ida.

Hosi insidénsia COVID-19 iha Timor-Leste, durante loron hitu ikus maka 3,7/100 mil abitante, enkuantu ba de’it munisípiu Díli 8,9/100 mil abitante.

Maski insidénsia nasionál no iha Munisípiu Dili, Baucau ho Manatuto redúz ba beibeik, insidénsia ohin nian hatudu katak, munisípiu Dili nafatin iha risku bo’ot liu atu populasaun hetan da’et no hada’et tutuan virus SARS-CoV-2.

Informasaun hosi izolamentu

Iha 29 juñu 2021, izolamentu Vera Cruz halo tratamentu ba kazu detetadu na’in 13, iha área obstetrisia na’in-tolu no iha medisina interna na’in-10. Iha obstetrisia na’in-tolu kategoria leve (mild) hotu. Iha área medisina interna na’in-10. Tolu grave krítiku, ida uza ventiladór, nain-rua uza oksijéniu, na’in-rua moderadu no na’in-lima leve mild.

Númeru kazu moderadu no grave ne’ebé baixa iha Vera Cruz, hatudu katak, bainhira ema barak liu detetadu pozitivu, barak-liu tan mak sei baixa ho kategoria moderadu no grave.

Hahú 02 juñu 2021, ema ne’ebé rekoperadu ona hosi moras COVID-19 no liu ona hosi izolamentu terapéutiku domisiliár iha uma-rasik ka iha fatin ne’ebé estadu prepara, bainhira atu dezloka sai hosi ka tama ba serka sanitária, la presiza  halo swab, maibé nafatin presiza hetan autorizasaun esepsionál hosi Diretór SIJK.

Atu bele prosesa autorizasaun esepsionál tenki hatudu sertifikadu alta hosi izolamentu, ne’ebé Ministériu Saúde, liuhosi ninia Pilár hitu, fó ba ema rekoperadu.

Apelu

Apela ba populasaun iha Timor-Leste laran tomak atu tu’ur hakmatek, kumpri ho rigór regra serka  sanitária  no konfinamentu  domisiliáriu  ne’ebé Konsellu Ministru deside  no implementa ona.

Husu atu hotu-hotu kolabora ho autoridade saúde hodi  bele  buka-tuir  ema  hotu  ne’ebé  hetan da’et  ona virus ne’e, no izola hosi no labele hada’et-tutan ba ema ne’ebé seidauk hetan da’et.

Ba populasaun tomak, favór respeita nafatin regra prevensaun no ijiéne individuál ne’ebé Governu hatuur ona atu prevene moras COVID-19 da’et ba mai.

Regra sira ne’e, mak hanesan uza máskara, fase liman bebeik ho sabaun ka uza dezinfetante ruma, evita kose liman ba matan, inus ho ibun, bainhira kumprimenta-malu la presiza kaer-liman, bensa-liman, rei-malu ka hakuak-malu, evita halibur-malu barak, hamriik ka tuur dook hosi ema seluk mínimu metru ida ho balun.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here