Diretór Nasionál Biblioteka no Muzeu, João Fátima da Cruz

DILI, 30 maiu 2019 (TATOLI)Sekretaria Estadu Arte no Kultura liuhusi Diresaun Biblioteka no Muzeu sei kria Asosiasaun Biblioteka Timor-Leste ne’ebé atu akumula biblioteka sira iha Timor laran tomak.

“Agora dadaun, ami atu estabelese semináriu ida atu kria Asosiasaun Biblioteka Timor-Leste ne’ebé maka sei akumula hotu biblioteka eskola ensiñu sekundáriu, universidade no ba biblioteka públiku sira. Bainhira ita iha biblioteka nasionál ona, ita-nia asosiasaun ne’e bele funsiona no koopera ho biblioteka nasionál para ita bele hatene dezenvolvimentu biblioteka iha Timor laran ne’e la’o to’o ne’ebé ona,” dehan Diretór Nasionál Biblioteka no Muzeu, João Fátima da Cruz, ba jornalista TATOLI liuhusi entrevista ne’ebé hala’o iha nia kna’ar fatin, Avenida Portugal, kinta ne’e.

Aleinde ida ne’e, nia hatutan, governu halo kapasitasaun ba iha rekusru umanu iha diresaun refere kona-ba biblioteka tanba maioria funsionáriu sira ne’ebé serbisu iha Diresaun Nasionál Biblioteka ne’e, la’ós background ba biblioteka. Entaun, sira tenke fó formasaun ba kurtu prazu iha rai laran no ba rai li’ur, atu oinsá maluk sira apriende di’ak liu-tan para hodi bele mai serbisu iha futuru Biblioteka Timor-Leste.

Dadaun ne’e, nia hateten, governu iha ona planu ba tinan 2020 oin mai sei haruka  joven sira ba kontinua sira-nia estudu liuhusi bolsu estudu ne’ebé serbisu hamutuk ho Fundu Dezenvolvimentu Kapitál Umanu (FDCH-sigla portugés,) kona-ba biblioteka nian.

“Planu ne’e tau iha tinan 2020. Ita atu haruka ema na’in 5 ka na’in 10 hanesan ne’e. FDCH aseita ona. Depois tinan ida ne’e, ami halo diskusaun ho sira kona-ba mekanizmu oinsá atu halo rekrutamentu ba ita-nia joven sira ba foti linsensiatura iha biblioteka, ne’e para sira mai bele serbisu iha Bibliiteka Nasionál,” João haklaken.

Kona-ba kapasitasaun rekursu umanu, diretór ne’e esklarese, dadaun ne’e governu halo hela kooperasaun ho Xanana Gusmão Reading Room atu oinsá funsionáriu sira ba apriende iha sira-nia fatin kona-ba sistema baze dadus kona-ba KOHA. Xanana Gusmão Reading Room fó tempu ba funsionáriu sira para sira ne’e bele ba apriende sistema KOHA iha ne’ebá.

Tuir programa anuál ne’ebé iha, João tenik, sira sempre fó formasaun ba profesór sira iha munisípiu sira iha Timor laran tomak kona-ba jestaun biblioteka nian liliu oinsá halo katalog ba livru sira. Formasaun refere halo ba sira ne’ebe responsável biblioteka iha eskola sira no mós ba responsável biblioteka públiku sira ne’ebé maka iha munisípiu sira.

Entretantu, nia haktuir, iha Diresaun Nasionál Biblioteka sempre ba halo sensibilizasaun biblioteka ba estudante sira, ho objetivu oinsá hakbesik biblioteka ba estudante sira no  motiva sira oinsá utiliza  biblioteka ne’e halo didi’ak, nune’e biblioteka iha karik sira bele hakbesik-án para bele hetan informasaun no hatene di’ak liu-tan funsionamentu biblioteka.

Nia informa, dadaun ne’e Sekretaria Estadu Arte no Kultura (SEAK) iha mini biblioteka iha kontentór ne’ebé halibur livru kuaze 7.000 resin. Livru kona-ba siénsia sira ne’e, balun SEAK simu hosi doadór sira hosi Portugal. SEAK mós tau ona iha planu atu halo akizisaun hola livru iha instituisaun sira ne’ebé mak iha livru.

Jornalista: Cancio Ximenes

Editór: Xisto Freitas

HAKEREK NO HATÁN

Please enter your comment!
Please enter your name here