SEPS oferese ona materiál konstrusaun ba vítima dezastre naturál hamutuk 115 iha postu administrativu Maliana, munisípiu Bobonaro, tersa (29/06/21). Imajen Tatoli/Sérgio da Cruz.

BOBONARO, 29 juñu 2021 (TATOLI)—Governu liuhosi Sekretária Estadu Protesaun Sivíl (SEPS), oferese ona materiál konstrusaun ba vítima dezastre naturál hamutuk 115 iha postu administrativu Maliana, munisípiu Bobonaro.

Vítima hirak-ne’e iha uma ka’in 11 mak uma hetan estragu totál hosi anin no inséndiu, restu anin sobu kalén ho estragu kamán.

Notísia relevante:SEPS-CRS oferese apoiu umanitáriu ba família 529 iha Becora

Materiál ne’ebé Governu oferese mak hanesan, sira ne’ebé uma hetan estragu totál hetan kalén 50, semente saka 25, besi betón 10mm iha 12, 8mm iha 10, semente saka 25, pregu kalén 2kg, pregu 10cm iha kilo ida, 12cm iha kg ida no arrame rolu rua ho osan mão de obra $368.

Kona-bá vítima na’in 104 ne’ebé uma hetan estragu kamán simu kalén 50, pregu kalen kilo rua no osan mão de obra hamutuk $150.

Vítima hirak-ne’e rejistadu tanba uma hetan estragu iha tinan kotuk iha suku hitu mak hensan, Ritabou, Raifun, Lahomea, Odomau, Holsa, Tapo-Memu no Saburai.

Administradór postu administrativu Maliana, Anibal Ferreira, husu ba benefisiáriu-sira atu utiliza materiál hirak-ne’e hodi konstrui uma ho dignu maski apoiu ne’e natón maibé Governu nia Kbiit ohin loron bele distribui hotu ba vítima-sira.

“Ba komunidade labele muda no dada tempu, ida-idak tenke halo ona obra ne’e atu bele hetan uma ne’ebé maka dignu,” Anibal Ferreira  hateten, iha Jináziu munisipál Maliana, Tersa ne’e.

Parte autoridade postu sei kria ekipa Task-Force atu koordena ho autoridade lokál, nune’e bele halo kontrolu no observa benifisiáriu ne’ebé konstrui uma iha ida-idak ninia suku.

Bainhira ekipa identifika benifisiáriu balun la utilza materiál ho osan ne’e tuir regra, ekipa sei foti hikas materiál hirak-ne’e hodi oferese ba komunidade ne’ebé presija.

Iha fatin hanesan benefisiáriu Filomeno Talo, agragase ba apoia ne’e, tanba bele tulun-sira hodi konstrui uma ne’ebé hetan estragu.

“Ha’u kontenti tebes, no ha’u sei lori materiál hirak-ne’e atu halo uma ne’ebé ahi han mutuk to’o agora sei hela de’it iha baraka,” nia promete.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here