Sekretáriu Estadu Protesaun Sivíl (SEPS), Joaquim Gusmão hamutuk ho Country Diretora CRS, iha Timor-Leste(TL), Yane Tamonob Pinto oferese apoiu umanitáriu ba família hamutuk 529, iha aldeia Kakeu-laran no Lafuk suku Becora, postu administrativu Cristo Rei (21/06/21). Imajen Tatoli/Nelson de Sousa.

DILI, 21 juñu 2021 (TATOLI)—Sekretária Estadu Protesaun Sivíl (SEPS) ho Catholic Relief Services (CRS) iha Timor-leste(TL), oferese apoiu umanitáriu ba família hamutuk 529, iha aldeia  Kakeu-laran no Lafuk suku Becora, postu administrativu Cristo Rei, munisípiu Dili, ne’ebé afetadu hosi dezastre naturál iha 04 abríl.

Sasán ne’ebé família afetadu-sira simu ho pakote, kompostu hosi ai-hán hanesan foos, ikan latan, deho, biskuit, susu-ben, masin-midar, mina bimoli, sasán kuziña no sasán ijéne hanesan pastadente, sabaun, máskra ho sira seluk.

Notísia relevante:SEPS distribui ona materiál konstrusaun ba família 1.083 iha Dili

“Sasán sira ne’e mai hosi CRS no ita serbisu hamutuk ho SEPS hodi fornese dadus atu apoia vítima-sira,” Country Diretora CRS, Yane Tamonob Pinto, hateten ba jornalista Agência Tatoli iha sede suku Becora, segunda ne’e.

Iha situasaun kalaminidade, CRS serbisu hamutuk ho protesaun sivíl hodi kontribui ajudu umanitáriu  ba família afetadu, no hein katak ho apoiu ne’e bele hakmán família-sira.

Sekretáriu Estadu SEPS, Joaquim Gusmão, hateten maski distribuisaun ba apoiu ne’e tarde, maibé Governu kontinua fó apoiu ba vítima-sira tuir dadus ne’ebé autoridade lokál kada suku rekolla, hodi hato’o ba sentru operasaun dezastre no família ne’ebé seidauk hetan apoiu bele hato’o reklamasaun hodi bele hetan apoiu tuir-mai.

Tanba ne’e Juaquim Gusmão agradese ba CRS ne’ebé serbisu hamutuk ho SEPS hodi bele fó apoiu ba família sira-ne’e.

Tuir dadus hosi autoridade suku, família 592 ne’e sofre inundasaun bee tama uma hodi estraga sasán uma laran no seluk tan.

Iha distribuisaun ne’e, ekipa CRS-SEPS oferese uluk ba família 331 hosi aldeia Kakeu-laran no tuir-mai sei kontinua distribui ba família 198  hosi aldeia Lafuk.

Antes ne’e, CRS fó ona apoiu umanitáriu hanesan ba família afetadu iha munisípiu Viqueque 500, Baucau 387 no Dili 979.

SEPS ekonraza komunidade atu vasina

Joaquim Gusmão mós aproveita hodi enkoraza komunidade Becora atu hakbesik an ba sentru saúde ne’ebé besik hodi hetan vasina.

Nia dehan, vasina importante tebes hodi aumenta imunidade atu luta kontra COVID-19, tanba ne’e nia parte simu ona vasina  ho tipu Aztrazeneca  doze dahuluk no daruak.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here