Juiz Administradór TDD, Afonso Carmona. Imajen Tatoli/Dok.

DILI, 29 juñu 2021 (TATOLI)—Tribunál Distritál Dili (TDD), sei reativa julgamentu movel hodi hakbesik atendimentu serbisu justisa ba sidadaun.

Juiz Administradór TDD, Afonso Carmona, hateten área jurisdisaun ne’ebé durante ne’e halo julgamentu movel mak hanesan Aileu, Liquiça, Ermera no Dili.

Notísia relevante:TDD hahú re-ajenda prosesu kazu krime-sivíl pendente

“Julgamentu movel ne’e ita sei to’o iha área-sira ne’ebé susar atu asesu ba estrada hodi hakbesik justisa ba komunidade,’’ Afonso Carmona, hateten ba jornalista Agência Tatoli iha knaar fatin, Mandarin, Dili, tersa ne’e.

Juiz Administradór ne’e konsidera julgamentu movel ajuda tebes sidadaun ne’ebé vunerável-sira, no durante ne’e kontribui tebes hodi redúz prosesu kazu pendente-sira ho signifikativu.

Nia dehan, funsionáriu no juiz-sira iha TDD maioria simu ona vasina doze dahuluk hodi hein doze daruak, atu aumenta imunidade hodi luta kontra COVID-19 no fasilita sirkulasaun.

Iha fatin hanesan, Defensór Públiku Jerál, Câncio Xavier, hateten atendimentu serbisu defensoria iha julgamentu movel hanesan iha reprezentasaun defensoria-nian iha munisípiu Baucau, Covalima daudaun-ne’e kontinua la’o normál.

Tanba ne’e, bainhira TDD hala’o hikas julgamentu movel, defensoria prontu halo dezlokasaun hodi fó asisténsia ba sidadaun, tanba julgamentu movel ne’e envolve juiz, prokuradór no defensór públiku.

Durante implementasaun serka sanitária no konfinamentu domisiliáriu, TDD labele realiza julgamentu movel, liu-liu iha konfinamentu domisiliáriu atende de’it prosesu urjente, nune’e tuir planu, julgamentu movel sei hahú reativa iha fulan jullu.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here