Logotipu TDD. Imajen Tatoli/Egas Cristóvão.

DILI, 29 juñu 2021 (TATOLI)—Tribunál Distritál (TDD), hahú halo re-ajenda loron julgamentu ba prosesu kazu krime no sivíl, ne’ebé  pendente tanba implementasaun konfinamentu domisiliáriu durante Estadu emerjénsia.

“Prosesu normál iha TDD la’o semana ida ona. Ita tenta re-ajenda prosesu uluk ne’ebé paradu hodi  marka fali loron foun atu bele realiza,’’ Juiz Administradór TDD, Afonso Carmona, hateten ba jornalista Agência Tatoli iha knaar-fatin Mandarin, Dili, tersa ne’e.

Notísia relevante:TDD re-julgamentu ba reklamasaun kazu rai hosi Alkatiri

Normalmente prosesu kazu-sira ho singular, nia dehan, ladún presja tempu no bele iha desizaun lalais maibé kazu ho komplesidade hanesan korrupsaun mak baibain presija tempu bele to’o tinan ida foin iha desizaun.

Alende ne’e, prosesu sivíl hanesan problema rai, bainhira parte-sira iha tentativa konsiliasaun maka sei iha sentensa lalais no sira-ne’ebé laiha tentativa konsialiasaun hodi kontinua ba julgametu mak presija tempu atu bele iha desizaun.

Oras-ne’e daudaun parte TDD iha juiz na’in 16, ne’ebé juiz na’in-neen kolokadu hodi atende prosesu sivíl no na’in-sanulu atende prosesu krime.

Iha fatin hanesan, Defensór Públiku Jerál, Câncio Xavier, hateten funsionamentu serbisu defensoria daudaun ne’e la’o normál no re-ajenda prosesu, ne’e kompeténsia Tribunál nian.

“Parte defensoria prontu hodi fó asisténsia legál ba sidadaun-sira, bainhira hetan ona ajenda distribuisaun ba julgamentu,” Câncio Xavier, hateten.

Durante implementasaun konfirnamentu domisiliáriu jerál iha fulan maiu, TDD redúz prosesu krime 30 hosi prosesu pendente no prosesu foun hamutuk 1.667, no iha abríl konsege redúz prosesu krime 104, hosi pendente no prosesu foun hamutuk 1.671.

Tuir dadus ne’ebé Agência Tatoli asesu hosi TDD, númeru kazu krime pendente hosi fulan maiu hamuutk 1.657, inklui prosesu foun sanulu ne’ebé foin rejista, nune’e númeru aumenta ba 1.667.

Hosi númeru ne’e, konsege finaliza prosesu hamutuk 30 no dadaun-ne’e kazu pendete iha fulan maiu hamutuk 1.637.

Kona-bá prosesu sivíl ne’ebé pedente iha fulan maiu hamutuk 866, no prosesu sivíl foun hamutuk ualu, nune’e kazu sivíl pendente aumenta ba 877.

Númeru ne’e Tribunál konsege finaliza kazu sivíl hamutuk sanulu no daudaun-ne’e kazu sivíl pendente hamutuk 864.

Tuir estatístika hosi TDD, tipu kazu krime ne’ebé rejista mak hanesan, ofensa integridade fizíka, violénsia doméstika, korrupsaun ho sira-seluk no kazu sivíl mak hanesan problema rai, kontratu ho sira-seluk.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here