TDD. Imajen Tatoli /Dok

DILI, 29 juñu 2021 (TATOLI)—Tribunál Distritál Dili (TDD), hala’o julgamentu ba kazu administrasaun danoza no pekulatu, ne’ebé deskonfia envolve arguidu LBF no arguida ESP hosi Ministériu Agrikultura no Peska (MAP).

Arguidu LBF iha tinan 2008 to’o 2013 hanesan Diretér Jerál MAP, no iha 2013 to’o 2015 asume kargu hanesan Diretór Jerál Kooperativu iha Ministériu ne’e, no arguida ESP momentu ne’ebá nu’udár  Xefe Departementu Finansa.

Notísia relevante:TDD sei reativa julgamentu movel

Tuir faktu katak, iha 14 maiu 2012, iha asinatura ida entre Governu Timor-Leste ho Timor- Leste Maize Storage Project (TLMSP),  projetu finansia ho orsamentu millaun $3-resin.

Projeitu ne’e asina entre Ministra Finansa ne’ebé reprezenta Governu no Prezidente Internasional Fund for Agriculture Development, ho benefisiáriu Diretór Ministériu Agrikultura no Peska.

Fundu ne’e aloka ba iha projetu ne’e hodi sosa mákina dulas batar ho materiál-sira tanba apoiu agrikultór-sira. Arguidu ho arguida ne’ebé halo dezeñu projetu TLMSP koñese planu implementasaun.

Arguida husu lisensa sem vensimentu funsionáriu MAP durante tinan rua, no hetan aprovasaun iha loron 01 fulan outubru 2012.

Iha loron 10 fulan setembru 2012, iha asinatura kontratu entre arguidu hanesan Diretór Jerál MAP, no arguida hanesan ofisiál  finansa iha TLMSP.

Iha loron 15 fulan outubru ATSEA programa, konvida arguidu hanesan Diretór Jerál no arguida hanesan Xefe Departementu finansa, hanesan funsionáriu MAP, hodi partisipa enkontru iha Austrália durante semana ida.

Arguidu hatene katak, arguida la ativa hanesan funsionáriu MAP, maski nunee kontinua fo autorizasaun hodi partisipa iha enkontru ne’ebé simu fundu Get-UNDP no ARSEA programa, Timor-Leste fundu viajen ba estranjeiru 15% durante semana ida.

Arguidu la iha podér atu bele autoriza ema ida ne’ebé la’ós funsionáriu públiku atu partisipa iha enkontru, hodi fo vantajen ba arguida.

Arguida laiha direitu atu halo viajen maibé kontinua partisipa hodi fó benefísiu ba nia-an. Arguida no arguidu hamutuk forma desizaun aproveita oportunidade atu benefisia sira.

Tanba ne’e kauza modo danu patrimonial ba Estadu ho montante  $509 no pagamentu hosi Get UNDP 15% pagamentu perdiem hosi Estadu RDTL durante semana ida viajen ba estranjeiru ne’ebé seida’uk apuradu loloos nia montante.

Tanba ne’e Ministériu Públiku (MP), akuza arguidu LBF autór material ba krime administrasaun danoza ne’ebé previstu iha artigu 274 hosi kódigu penál (KP). Ko-autor material ba krime pekulatu ne’ebé previstu iha artigu 295 hosi KP. Arguida ESP autora material ba krime pekulatu ne’ebé previstu iha artigu 295 hosi KP.

Liu hosi audiénsia julgamentu, arguido ho arguida hili direitu silénsiu lakohi ko’alia ba faktu akuzasaun ne’e, tanba hatama ona kontestasaun  antes hodi responde ba akuzasaun-sira.

Kona-bá atu rona sasin, parte MP mantein ho sasin nia deklarasaun liuhosi kontestasaun antes ne’ebé hato’o ona iha MP.

Maibé, parte defeza sei prepara rekezitu hodi hatama iha loron ne’ebé termina ona, bainhira iha kontradisaun ruma bele koloka pergunta balun ba sasin hosi parte MP nian.

Nune’e, Tribunál adia fila-fali julgamentu ne’e ba iha loron 13 jullu tinan ne’e hodi rona sasin sira-seluk.

Audiénsia julgamentu ne’e prezide hosi juiz kolektivu, Ana Paula, Maria Solana, Ivan Suritai, MP reprezenta hosi prokuradora, Lídia Soares, arguidu hetan asisténsia legál hosi Defensór Públiku, Henrique Mariz no  arguida hetan asisténsia legál hosi Advogadu Privadu, José Guterres.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here