Idózu no ema ho difisiente forma hodi simu subsídiu iha sukursál BNCTL, iha Dili. Imajen TATOLI/António Gonçalves

DILI, 29 juñu 2021 (TATOLI)—Prezidente Konselllu Administrasaun Instituisaun Seguransa Sosiál (INSS), Longuinhos Armando Leite, hateten bainhira moras COVID-19 aumenta tan mak INSS no Banku Nasionál Timor-Leste (BNCTL, sigla portugés) sei prodús Automatic Teller Machine (ATM) hodi fasilita idozu sira atu simu osan. 

Notísia Relevante: INSS submete dadus idozu 94.000 ba BNCTL atu prodús ATM

“Ita hamutuk ho BNCTL iha planu atu prodús ka kria ATM ne’ebé ho durasaun tinan ida ba ferik-katuas (terseira idade) sira iha pandemia COVID-19. Ita hanoin estabelese ATM, karik COVID-19 iha Timor-Leste aumenta tan,” Longuinhos Armando Leite hateten ba Agéncia TATOLI iha Ministériu Finansa, Aitarak-Laran, Dili, tersa ne’e.

Produsaun ATM ba ferik-katuas sira-ne’e atu fasilita sira hodi kumpre distánsia sosiál no fíziku iha prosesu pagamentu nia laran, maibé la’ós agora tanba pagamentu idozu ba faze dahuluk nian hahú ona maibé bainhira moras COVID-19 ne’e kontinua eziste entaun INSS-BNCTL sei diskute kle’an atu bele prodús.

“Ha’u labele dehan garante atu prodús ATM hodi uza ba pagamentu faze daruak nian. Maibé ita haree no akompaña situasaun tanba informasaun ne’ebé ita rona vírus variante Delta ne’ebé iha Indonézia komesa espalla ona no karik tama iha Timor-Leste mak ita buka para proteje. Entaun liuhosi ATM mak bele minimiza konsentrasaun ema-nian, tanba ne’e ita hanoin estabelese ATM,” nia dehan.

Maibé, nia dehan, tanba prosesu ne’e presiza tékniku entaun iha pagamentu ba idozu sira iha faze dahuluk ne’e, INSS no BNCTL seidauk bele uza ATM no halo pagamentu hanesan baibain de’it.

“Atu prodús ATM ne’e ba munisípiu hotu maibé tuir ha’u-nia hanoin ne’e ba territóriu ne’e, maibé iha munisípu suku balun ka área remota laiha liña internete. Entaun, buat hirak ne’e hotu presiza haree lai mak foin prodús ATM ne’e. Tanba pagamentu hotu tuir kontratu katak ita selu to’o iha suku nune’e mais téknika ita sei diskute kle’an tan mak foin kria,” nia dehan.

Dadus 3.000 resin seidauk verifika

Entretantu, nia informa, dadus entidade empregadór no fakultativu sira-nian ne’e, ema ema besik 3.000 seidauk verifika no parte INSS sei esforsu atu oinsá bele verifika hotu no bele konklui ba prosesu pagamentu.

Maibé, nia dehan, ohin tama ona ba loron 29 juñu maibé INSS seidauk halo hotu verifikasaun, maibé sira kontinua verifika to’o finaliza tanba dadus ne’ebé mak tama ona ne’e tenke tau konsiderasaun.

“Ohin, loron 29 juñu ona maibé ita nafatin esforsu atu halo verifikasaun ba dadus besik 3.000 no dadus ne’ebé ita verifika ona ne’e 9.000-resin. Rejistu mak aban taka ona maibé verifikasaun ne’e kontinua hela, tanba bainhira ema hatama ona dadus ita sei konsidera no konklui hotu,” nia dehan.

Prezidente INSS ne’e garante katak iha fulan jullu nia-laran ne’e, INSS sei halo pagamentu ba dadus sira-ne’ebé mak verifika ona.

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here