Ministru Obra Públika, Salvador Eugênio Soares dos Reis Pires. Imajen Tatoli/Egas Cristovão

DILI, 01 setembru 2020 (TATOLI)-Ministériu Obra Públika (MOP) submete ona pedidu ba Ministériu Finansa (MF) atu asesu fundu empréstimu hodi moderniza sistema liña distribuisaun enerjia Eletricidade de Timor-Leste (EDTL).

Ministru Obra Públika, Salvador Eugênio Soares dos Reis Pires, konsidera presiza moderniza sistema liña distribuisaun eletrisidade atu mellora di’ak liután fornesimentu enerjia ba komunidade.

“Iha tinan kotuk liubá ha’u sempre pronúnsia katak infraestrutura presiza moderniza, liuliu iha liña distribuisaun eletrisidade tanba uza sistema manuál, kuandu avaria ita identifika manuál de’it no fízikamente tékniku sira iha terrenu tenke la’o tuir liña lori lampra leno no bainhira avaria ne’e ki’ik susar atu identifika no lori tempu barak. Tanba ne’e, iha nesesidade atu dijitaliza atubele identifika lokál avaria automátikamante no ajuda atendimentu lalais liután,” tenik Ministru Salvador, foin lalais ne’e iha Palásiu Governu.

Tuir nia, iha sistema Governu, MF maka iha kompeténsia asesu ba fundu empréstimu, tanba ne’e MOP submete ona pedidu atu analiza no haree fundu balun hodi hatan ba nesesidade ne’e.

Governante ne’e dehan, bainhira dijitaliza ona sistema distribuisaun, maka avaria iha fatin ruma bele identifika lokál no área seluk bele fornese fali enerjia eletrisidade hosi fatin seluk, nune’e labele fó impaktu ba kliente EDTL sira ne’ebé asesu iha liña ka feeder ida de’it.

Nia esplika, sub-estasaun iha kapitál Dili ida de’it maka iha Kamea no ninia liña distribuisaun atu fornese enerjia eletrisidade hosi Becora to’o Mota-ulun Comoro, tanba ne’e bainhira komunidade ne’ebé hela iha liña ne’e avaria ida mak sei la hetan hotu enerjia eletrisidade, nune’e mós ba liña seluk.

Bainhira sistema dijitalizadu ona maka bele izola de’it iha fatin avariasaun no fatin seluk bele kontinua hetan enerjia eletrisidade.

“Infraestrutura ka sistema ne’ebé seidauk investe, presiza investe. Klaru investimentu infraestrutura ne’e atu halo mudansa ita presiza rekursu finanseiru tanba bainhira osan laiha ita la ko’alia,” nia akresenta.

Maski MOP divulga programa sira maibé tenke iha suporta finanseiru liuhosi kooperasaun MF, atu hetan asesu fundu hosi Orsamentu Jerál Estadu (OJE) ka empréstimu.

“Iha kazu ne’e, ami husu ajuda Ministériu Finansa ajuda halo negosiasaun ho parseiru sira, agora maihosi parseiru sira ne’e la importa, importante bele providénsia fundu atubele finansia ita-nia projetu sira,” Ministru akresenta.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here