Diretor Sentru Formasaun Judisial, Antonino Gonçalves. Imajen/Dok. Tatoli

DILI, 29 juñu 2021 (TATOLI)—Juiz Antonino Gonçalves, eleitu hodi reprezenta Tribunál iha Komisaun Nasionál Eleisaun (CNE sígla portugés), ba periúdu 2021 to’o 2025.

Antonino Gonçalves eleitu hodi troka komisáriu ka vogál atuál ne’ebé reprezenta Tribunál iha CNE, juiz Duarte Tilman hamutuk ho Juiz Administradór Tribunál Distritál Dili, Afonso Carmona, nu’udár suplementu ne’ebé mandatu sei termina iha 16 agostu tinan ne’e.

Notísia relevante:PN altera ona lei eleitorál tolu iha jeneralidade

Afonso Carmona hateten, tuir lei CNE, reprezentasaun juiz hosi Tribunál ne’ebé ba iha Komisaun ne’e tenke liuhosi eleisaun no tuir pedidu hosi Prezidente Parlamentu Nasionál (PPN).

“Tanba ne’e, horisehik juiz hotu-hotu partisipa iha eleisaun ho rezultadu votasaun maioria hili ona juiz Antonino Gonçalves ne’ebé sei reprezenta Tribunál iha CNE hanesan komisáriu ka vogál ho  juiz João Ribeiro hanesan suplementu,’’ Afonso Carmona, hateten ba jornalista Agência Tatoli, iha knaar fatin, Mandarin, Dili, tersa ne’e.

Iha fatin hanesan, Antonino Gonçalves, agradese ba konfiansa no bainhira simu ona pose sei hahú hala’o knaar  hanesan reprezentasaun juiz ba iha CNE, ne’ebé sei hala’o serbisu tau aas liu hodi tuir lei eleitorál no kompeténsia ne’ebé atribui ona.

Tuir planu, iha 01 jullu sei haruka naran kandidatu foun-sira ba iha PN, hodi hein data pose ba mandatu tinan lima.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here