Plenaria Parlamentu Nasional. Imajen Tatoli Antonio Goncalves.

DILI, 21 juñu 2021 (TATOLI)—Reprezentante povu iha uma fukun Parlamentu Nasionál (PN), segunda ne’e altera ona lei eleitorál tolu iha faze jeneralidade no diskusaun iha faze espesialidade nian sei hala’o iha munisípiu Aileu.

Proposta-alterasaun datoluk ba lei númeru 5/2006, 28 dezembru, kona-ba órgaun administrasaun eleitorál altera ho rezultadu votasaun a-favór 36, kontra 0 no abstensaun 15.

Votasaun ba proposta-alterasaun dahuluk ba lei númeru 6/2016, 25 maiu, kona-ba lei resensiamentu eleitorál altera ne’e, ho rezultadu votasaun a-favór 36 , kontra 0 no kontra 15.

Entretantu alterasaun daneen ba lei 7/2006, 28 dezembru, kona-ba lei eleitorál ba prezidente-repúblika, altera ho rezultadu votasaun a-favór 36 , kontra 0 no abstensaun 15.

“Aprova hotu ona jeneralidade, haree ba artigu 95 Konstituisaun Repúblika entaun matéria iha proposta-lei tolu ne’e tama iha eskluziva Parlamentu Nasionál nian, sé plenária autoriza entaun aban lokraik Komisaun A dezloka ba Aileu hodi halo diskusaun iha espesialidade,” Prezidente Parlamentu Nasionál, Deputadu Aniceto Longuinhos Guterres Lopes, anunsia liuhosi plenária.

Hatán ba pedidu Parlamentu Nasionál nian, Ministru Administrasaun Estatal, Miguel Pereira de Carvalho laiha objesaun.

“Governu laiha objesaun ba kualkér desizaun ne’ebé deputadu sira foti,” Ministru Miguel fó resposta.

Hafoin rona tiha pozisaun Governu  nian, Prezidente Parlamentu Nasionál deside halo votasaun ba dezlokasaun Komisaun A nian ba munisípiu Aileu ho rezultadu votasaun a-favór 46, kontra 0 no abstesaun 4.

“Nune’e Komisaun A autorizadu atu trata  diskusaun no aprovasaun iha espesialidade ba pakote lei eleitorál tolu ne’e iha munisípiu, tanba ne’e husu kolaborasaun Governu nian iha diskusaun iha espesialidade,” Prezidente Parlamentu Nasionál fó-sai hafoin plenária atutoriza Komisaun A halo diskusaun iha epesialidade.

Deputada Bankada CNRT, Carmelita Cateano Moniz preokupa ho alterasaun ba lei eleitorál Prezidente Repúblika kona-ba sentru votasaun paralelu ne’e maibé jeralmente atu mellora di’ak liután lei eleitorál liuliu kona-ba alterasaun ba órgaun eleitorál no resensiamentu eleitorál.

“Ami husu Ministru Administrasaun Estatál foka ba kestaun téknika la’ós polítika nune’e ema hotu ba ezerse direitu votu iha loron votasaun. Governu nia hanoin atu estabelese sentru votasaun paralelu atu garante ema hotu, maibé hosi ami-nia parte ida-ne’e sei la garantia. Tanba, sentru votasaun paralelu ne’e ita loke de’it iha Dili entaun oinsá ho pasiente sira-ne’ebé halo tratamentu iha ospitál referrál sira iha munisípiu sira, ne’e diskriminasaun entre Dili no munisípiu sira. Maibé, restu ne’e kestaun téknika,” nia dehan.

Deputadu Bankada FRETILIN, Antoninho Bianco konsidera proposta Governu prenxe rekizitu formál, legál no konstitusionál tanba alterasaun ne’e la’ós substansiál.

“Ha’u hanoin katak prinsípiu lei, estrutura lei no sistema lei ne’e prenxe rekizitu. Tanba ne’e ha’u fó hanoin lei resensiamentu eleitorál di’akliu haree didi’ak hodi atualiza lista eleitór ne’e tanba balun aumenta no balun mate. Tanba dalaruma ema sira-ne’ebé mate ona maibé naran sei iha, haree mós eleitór iha estranjeiru tanba ne’e kustu boot liu,” Deputadu Bankada FRETILIN fó hanoin.

Entretantu Prezidente Parlamentu Nasional, Deputadu Aniceto Guterres fó hanoin ba deputadu sira atu halo proposta-alterasaun nune’e deskute iha jeneralidade.

Ministru Administrasaun Estatál (MAE), Miguel Pereira de Carvalho, hateten objetivu prinsipál hosi proposta-lei tolu ne’e mai Parlamentu Nasionál atu kumpre programa VIII Governu Konstitusionál nian iha área administrasaun eleitorál.

“Hodi halo revizaun no halo atualizasaun ba lejizlasaun eleitorál sira ho forma atu fortalese klarifika no pandemia COVID-19 ne’e, halo ita tau hanoin ruma oinsá atu organiza eleisaun prezidensiál nomós eleisaun parlamentár tuir mai,” nia dehan. 

Governante ne’e esplika ba deputadu sira katak sei diskute kle’an liután iha faze espesialidade ba proposta-alterasaun ba lei eleitorál tolu ne’e.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here