Vasina AstraZeneca, sesta (21/05/21). Imajen Tatoli/António Gonçalves.

DILI, 29 juñu 2021 (TATOLI)—Tuir planu, aban Austrália sei transporta tan AstraZeneca doze rihun 65 mai Timor-Leste (TL).

”AstraZeneca doze rihun 65 ne’e aban to’o TL no sei fó prioridade ba munisípiu 12, inklui RAEOA,” Diretór Ezekutivu Serbisu Autónomu Medikamentu no Ekipamentu Saúde (SAMES), Santana Martins hateten ba jornalista Tatoli iha salaun Ministériu Finansa Aitarak-laran, tersa ne’e.

Notísia relevante:Abitante 5.496 iha Manatuto simu ona vasina AstraZeneca

Ministériu Saúde iha ona planu katak, bainhira vasina hamutuk doze rihun 65 ne’e to’o mai TL, sei uza hodi kompleta doze dahuluk ne’ebé antes ne’e oferese ona ba liña frente-sira, inklui ema ho idade 60 ba leten, iha semana oin.

Santana Martins mós informa katak, vasina AstraZeneca hosi Austrália ne’ebé antes ne’e Governu TL simu uluk ona hamutuk doze rihun 70 ne’e, kobre iha Dili, nune’e  doze rihun 65 ne’ebé sei to’o aban prioridade ba munisípiu sira-seluk.

Tabela distribuisaun ne’ebé SAMES prepara no aban sei distribui mak hansan, munisípiu Aileu iha 300 vial, Ainaro 300, Baucau 1.050,  Bobonaro 750, Covalima 700, Ermera 450, Lautém 450, Liquiça 350, Manatuto 625, Manufahi 350, RAEOA 475 no Viquque 700.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here