Prezidente Repúblika,Francisco Guterres Lú Olo. Imajen Tatoli/António Gonçalves.

DILI, 02 juñu 2021 (TATOLI)—Prezidente Repúblika, Francisco Guterres Lú Olo, liuhusi Dekretu Prezidente Repúblika númeru 35/2021 iha 28 maiu 2021, dekreta Estadu Emerjénsia  ba dala-XIV ba loron 30,  hahú hosi tuku 00.00 iha kuarta (02 juñu 2021) no termina iha tuku 23.59 iha kinta (01 jullu 2021).

Notísia Relevante: PN autoriza PR dekreta estadu emerjénsia ba dala-XIV

“Deklarasaun estadu emerjénsia sei abranje territóriu nasionál tomak, mai ho fundamentu iha subsisténsia ba situasaun kalamidade públika. Estadu emerjénsia sei parsialmente suspende direitu ba sirkulasaun internasionál, liberdade sirkulasaun no fixasaun rezidénsia, direitu reuniaun no manifestasaun, liberdade ba kultu, direitu ba edukasaun no direitu propriedade, direitu ba rezisténsia no inisiativa ekonómika privada,” Prezidente Repúblika, Francisco Guterres Lú Olo, hateten liuhosi komunikadu imprensa ne’ebé Agência TATOLI asesu, kuarta ne’e.

Autoridade públika kompetente sei impoin medida importante hodi prevene importasaun estirpes foun SARS-CoV-2 ba territóriu nasionál no permite kontensaun no nia alastramentu entre populasaun liuhosi dalan taka fronteira, bandu estranjeiru sira mai territóriu nasionál, estabelesimentu regra distansiamentu sosiál, impozisaun ba obrigasaun halo teste, izolamentu ba pasiente infetadu, konfinamentu domisiliáriu no determinasaun serka sanitária.

Prezidente Repúblika dekreta Estadu Emerjénsia ne’e hafoin pedidu estensaun aprova iha Parlamentu Nasionál, maibé antes Konsellu Superior Defeza no Seguransa no Konsellu Estadu husu Prezidente Repúblika haruka pedidu autorizasaun ba Parlamentu Nasionál estensaun Estadu Emerjénsia ba dala-XIV

Iha Timor-Leste kazu konfirmadu ho COVID-19 ho númeru akumuladu hamutuk 7161 desde marsu 2020, kazu ativu 2630 no rejista mate na’in-16.  Haree ba númeru kazu COVID-19 ne’ebé aumenta hosi loron ba loron, Estadu kontinua foti medida prevensaun no kombate kontájiu virus SAR-CoV-2.

Desde fulan marsu 2020, hafoin rejista kazu konfirmadu ida ho SARS CoV-2 Timor-Leste implementa kedas estadu emerjénsia atu fó kbiit ba Governu atu foti medida prevensaun no kontrolu hodi hasees sidadaun hotu-hotu hosi kalamidade públika ne’ebé bele mosu hosi moras COVID-19.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here