Sekretária Estadu Igualdade no Inklusaun, Maria Jose da Fonseca Monteiro de Jesus. Imajen TATOLI/ Egas Cristovão.

DILI, 18 fevereiru 2021 (TATOLI)–Sekretária Estadu Igualdade Inkluzaun (SEII), Maria José da Fonseca Monteiro de Jesus, hateten SEII no rede referál sira-ne’ebé rejistu ba Planu Asaun Kontra Violénsia iha 2019 rejista kazu violénsia doméstika no asédiu seksuál hamutuk 1.338.

Notísia Relevante: 2019-Inísiu 2020, Kazu Violénsia Doméstika Aas Liu Iha TL

“Hosi totál kazu 1.338 ne’e, kazu violénsia doméstika hamutuk 1.071 no asédiu seksuál hamutuk 267,” Maria da Fonseca Monteiro de Jesus hateten iha ámbitu fórum ‘Hapara Violénsia Hasoru Feto no Labarik Feto’ iha salaun Katedral Vila Verde, Dili, kinta ne’e.

Hosi kazu violénsia doméstika hamutuk 1.071 ne’e, nia hatutan, kompostu hosi Munisípiu Aileu kazu hamutuk 64, Ainaro 21, Baucau 92, Bobonaro 65, Covalima 16, Dili 334, Ermera 80, Lautém 22, Liquiça 115, Manatuto 31, Manufahi 15, RAEOA 148 no Viqueque 68. 

Kona-ba asédiu seksuál, nia informa, SEII rejistu kazu hamutuk 267 ne’ebé kompostu hosi Munisípiu Aileu hamutuk 13, Ainaro 11, Baucau 39, Bobonaro 2, Covalima 9, Dili 110, Ermera 18, Lautém 17, Liquiça 13, Manatuto 10, Manufahi 03, RAEOA 12 no Viqueque 10.

Tanba ne’e, nia hateten, atu prevene  no hakotu violénsia ne’e labele akontese beibeik presiza ema hotu-hotu nia kolaborasaun no servisu hamutuk. 

“Violénsia sei la lakon iha ita-nia rain, bainhira parte hotu-hotu la kolabora no la servisu hamutuk. Ita tenke hamriik hamutuk hodi dehan ‘lae” ba violénsia mak violénsia ne’e sei lakon,” nia esplika.

Nia dehan, Governu bele halo esforsu hotu-hotu no parseiru sira bele mai apoiu maibé violénsia sei la lakon tanba ema ida-idak la hala’o nia servisu ho loloos.

Tuir nia, se mídia mak públiku notísia kona-ba violénsia hirak ne’e entaun ema ida vítima ne’e kontinua sai vítima ba dala-rua, ba notísia sira-ne’e no violénsia sei la hotu.

Nia informa, relatóriu kazu violénsia ba 2020 nian seidauk konklui tanba sei iha prosesu nia-laran, no tuir planu sei hatama ba iha Parlamentu Nasionál iha fulan jullu tinan ne’e.

Jornalista: Osória Marques

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here