PNTL seksaun tránzitu Bobonaro, hala’o konsiensializasaun ba komunidade atu respeita kódigu estrada bainhira viajen. Imajen Tatoli/Sérgio da Cruz.

BOBONARO, 22 juñu 2021 (TATOLI)—Hahú janeiru to’o maiu, Polísia Nasional Timor-Leste (PNTL) Munisípiu Bobonaro, liu hosi Unidade Tránzitu halo apreensaun ba motór 247, tanba kontra regra tránzitu.

Komandante Seguransa Rodoviária munisípiu Bobonaro, Sarjentu Xefe, José Bere Soares, esplika hosi númeru ne’e iha motór 114 mak kontra órden, inspesaun liu prazu iha sanulu, la uza kapasete iha 63, tula no hatun iha haat, la lori dokumentu iha neen, veíkulu seidauk rejistu iha haat, CC la tuir kategoria iha rua, CC liu prazu iha neen  no laiha asesories iha motór hamutuk 57.

Notísia relevante:Transporte difikulta PNTL Bobonaro ba serbisu prevensaun COVID-19

Sarjentu Xefe, José Bere Soares  informa katak, infratór-sira ne’ebé kontra regra, Polísia Tránzitu Munisípiu Bobonaro, hatama reseita ba konfre Estadu hamutuk $7.021.

“Koima ne’ebé ita hatama ba kofre Estadu hosi janeiru $1.119, fevereiru $1.194, marsu $1.489, abríl $2.039, maiu $1.180 ho totál $7.021,” José Bere Soares, hateten ba jornalista Agência Tatoli iha Komandu PNTL Bobonaro, tersa ne’e.

Nia esplika, motorizada hirak-ne’e hetan apreensaun liu hosi atividade kontrola movimentu lor-loron iha kapitál Bobonaro no pasa revista fulan ida dala ida.

“Iha serka sanitária ita la halo pasa revista, maibé ita halo de’it kontrolu ba movimentu transporte sira. Hosi ida-ne’e ita haree sira ne’ebé kontra regra ita halo apreensaun,” nia subliña.

Alende ne’e, hahú hosi janeiru to’o juñu, Polísia Tránzitu munisípiu Bobonaro rejista asidente tráfiku hamutuk 31, ne’ebé motór ho motór xoke malu hamutuk 12, motor xoke karreta iha hitu, motór xoke ema la’o ain 12, karreta ho karreta xoke malu iha ida no asidente ka monu mesak iha ida.

Hosi kazu hirak-ne’e,  motór ho karreta ne’ebé hetan estragu totál iha tolu, estragu kamán iha 29, ekuantu ema na’in 28 ho kondisaun kanek kamán, kanek todan na’in-tolu no mate na’in-rua.

Ho situasaun ne’e maka, Polísia Tránzitu munisipál kontinua halo sosializasaun liuliu husu motorista-sira atu kumpre nafatin regra kódigu estrada.

Polísia Tránzitu Bobonaro mós bandu labarik ho menoridade kondúz motór, no bainhira detekta, polísia sei bolu atensaun ba inan-aman atu halo deklarasaun.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here