Komisáriu CAC, Sérgio Hornai. Imajen Tatoli/António Gonçalves.

DILI, 28 juñu 2021 (TATOLI)—Komisaun Anti Korrupsaun (CAC sígla portugés), sei prosesa benefisiáriu ne’ebé la elizível no seidauk devolde subsídiu $200, tuir prazu ne’ebé fó-sai  ona to’o 30 juñu 2021.

“Sira ne’ebé la elizível, ita alerta atu fó devolve ho voluntáriu tuir prazu ne’ebé termina no bainhira la entrega mak sei prosesa tuir dalan legál,’’ Komisáriu CAC, Sérgio Hornai, hateten ba jornalista-sira iha edifísiu CAC, Faról, segunda ne’e.

Notísia relevante:Mekanizmu devolve subsídiu $200, CAC-MSSI koordena ona ho BNCTL

Dadus CAC liuhosi Diresaun Prevensaun no Sensibilizasaun,  to’o 22 juñu iha benefisiáriu la elizível na’in 73 mak konsege devolve direta ba iha Banku Nasionál Komérsiu Timor-Leste (BNCTL sígla portugés).

Benefisíariu-sira ne’e serbisu iha instituisaun públiku no privada-sira, emprezáriu ka benefisíariu sira seluk hosi eskema espesiál ho kuantidade saláriu liu $500.

Iha agostu 2020, CAC, PDHJ, Komisaun Funsaun Públika, Inpeksaun Jerál Estadu, sosiedade sivíl no estudante-sira  deskobre katak, iha irregularidade lubuk ida tanba konfuzaun oi-oin kona-bá interpretasaun ida ne’ebé loloos ba provizaun relevante ba loos mak benefisíariu-sira, no problema sériu kona-bá verifikasaun baze dadus ba benefisíariu-sira.

Tanba ne’e, iha intervensaun-sira durante inspesaun  no monitorizasaun, ekipa CAC konsege trava imediatamente benefisiáriu ne’ebé la sujeita ba direitu asesu ba subsídiu ne’e, hamutuk 1.927 ne’ebé ekivalente ho valór $385.400.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here