Sukursál BNCTL foun iha RAEOA, sesta (20/11). Imajen TATOLI/Antónia Gusmão.

DILI, 28 maiu 2021 (TATOLI)—Komisaun Antí Korrupsaun (CAC sígla portugés), ho Ministériu Solidariedade Sosiál no Inkluzaun (MSSI), koordena ona atu benefisiáriu agregadu familiár la elizível, bele devolve direta subsídiu $200, iha Banku Nasionál Komérsiu Timor-Leste (BNCTL sígla portugés).

“Koordenasaun la’o tiha ona no segunda (31/05), ami sei haree fila-fali atu BNCTL bele hasai sirkulár ba sukursál-sira, nune’e bele atende sidadaun elizível-sira,” Adjuntu Komisáriu CAC ba Asuntu Prevensaun no Sensivilizasaun, Luis Oliveira Sampaio, hateten ba jornalista Agência Tatoli, sesta ne’e.

Notísia relevante:CAC fó ultimatum ba benefisiáriu ne’ebé seidauk devolve subsídiu $200

Luis Oliveira Sampaio esplika, Ministériu Finansa (MF) dezenvolve ona formuláriu ba prosesu ne’e, maibé ladún la’o di’ak, tanba ne’e iha inisiativa seluk iha koordenasaun ho BNCTL bele fasilita liu-tán sidadaun-sira iha sukursál-sira.

Tuir sirkulár ne’ebé fó-sai ona, to’o marsu tinan ne’e, agregadu familiár la elizível tenke devolve ona subsídiu $200, maibé ho implementasaun serka sanitária no konfinamentu obrigatóriu no mós dezastre naturál, nune’e prolonga tan to’o juñu.

Bainhira prazu ne’ebé termina benefisiáriu-sira la koopera, CAC sei foti medida represivu ka investigasaun, atu submete tuir regra prosesuál ne’ebé vigora.

Tuir dadus hosi MSSI, iha benefisiáriu na’in 18 mak voluntariamente ho konxiénsia-rasik entrega ona subsídiu ne’ebé sira simu ona, tanba la prienxe kritéria.

Iha 05 agostu 2020, ekipa konjunta ne’ebé kompostu hosi CAC, Provedoria Direitu Humanu no  Justiça (PDHJ sígla portugés), Inspesaun Jerál Estadu (IJE) no Komisaun Funsaun Públika (CFP sígla portugés), fó-sai rezultadu monitorizasaun, katak, benefisiáriu hamutuk 148 ho totál osan hamutuk $29.600, ne’ebé simu ona subsídiu agredadu familiár hosi Governu no tenke devolvidu.

Subsídiu ne’e tenke devolvidu tanba la prienxe kritéria, tuir dekretu lei apoiu monitáriu ba agregadu familiár tuir lei númeru 15/2020 ka nu’udár funsionáriu ne’ebé ho saláriu liu $500.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here