Logotipu TDD. Imajen Tatoli/Dok.

DILI, 24 juñu 2021 (TATOLI)—Tribunál Distritál Dili (TDD), adia julgamentu ba kazu fraúde fiskál ne’ebé deskonfia envolve hosi arguidu na’in-rua ho inisiál DG no FF.

TDD deside adia julgamentu ne’e tanba, arguidu FF  no Ministériu Públiku (MP) liuhosi prokuradór titulár ne’ebé ka’er prosesu ne’e la marka prezensa.

Notisia relevante:TDD julga kazu fraúde fiskál

Tuir informasaun ne’ebé  Tribunál simu katak, majistradu prokuradór ne’e dezloka ona ba Óe-cuse hodi halo atendementu ba prosesu seluk.

Kona-bá  arguidu ne’ebé  la marka prezensa, Tribunál solisita atu fó justifikasaun dentru loron lima razaun saida mak la marka prezensa no notifika fila-fali ba loron julgamentu ne’ebé marka ona.

Nune’e Tribunál adia fila-fali  julgamentu ne’e ba iha 14 fulan jullu tinan ne’e iha tuku 17:00 otl.

Proseu julgamentu ne’e prezide husi juiz Alvaro Maria Freitas, no akompaña husi defensór púbiku.

Tuir faktu katak, iha loron 23 fulan maiu 2015, arguidu DG liuhosi despasante ka broker LEA halo importasaun ba karreta mitsubishi ida ne’ebé importa hosi Indonézia no tula ho kontentór númeru MRTU, 2045508.

Tuir pedidu importasaun ne’ebé mak arguidu aprezenta, karreta ne’e sosa ho folin RP 215,681,818.00.

Iha 21 jullu 2015, bainhira ekipa inspesaun hosi  Alfándega finaliza inspesaun ba karreta ne’e, entega kedan relatóriu ba despasante LEA hodi ba prosesu aduaneiru úniku atu nune’e bele halo pagamentu ba taxa.

Relatóriu ne’e entrega ba arguidu FF nu’udár funsionáriu hosi ajénsia LEA, hodi ba selu taxa iha BNU.

Bainhira Alfándega halo inspesaun, arguidu DG fó fiar ba arguidu FF hosi kompañia LEA asiste prosesu inspesaun ba karreta to’o remata.

Akontese katak, bainhira iha 13 maiu 2016 funsionáriu Alfándega sira halo  fali-fali  verifikasaun ba karreta ne’e no identifika katak, arguidu na’in-rua lori ona karreta sai hosi portu Dili la ho koñesimentu hosi funsionáriu  Alfándega.

Alende ne’e, identifika mós katak, arguido-sira lori karreta sai, tanba hases-an hosi taxa ne’ebé iha, aplika tuir Alfándega no tuir loloos arguido-sira tenke selu taxa ho montante $926,06 maibé la halo ida ne’e.

Tanba ne’e, MP akuza arguidu nain-rua komete krime fraúde fiskál ne’ebé previstu iha artigu 314 hosi kódigu penál Timor-Leste.

Jornalista: Nelson  de Sousa

Editór: Cipriano Colo

HAKEREK NO HATÁN

Please enter your comment!
Please enter your name here