Vasina AstraZeneca. Imajen Tatoli/Francisco Sony

DILI, 25 juñu 2021 (TATOLI)—Organizasaun Mundiál Saúde (OMS) ho Ministériu Saúde (MS) Timor-Leste (TL) kontinua konsidera vasina Oxford-AstraZeneca mak tipu vasina ida ne’ebé iha seguransa no efikasia atu hasa’e imunidade ema nian hodi kontra COVID-19.

Konsiderasaun ne’e bazeia ba pozisaun hosi Grupu Konsultivu Tékniku Austrália ba Imunizasaun ka Austrália Technical Advisory Group on Immunization (ATAGI).

Notísia relevante:Governu presiza klarifika informasaun kontrovérsia kona-bá AstraZeneca

“Vasina COVID-19 sai nafatin ita-nia medida efetivu liu hodi responde ba surtu COVID-19 agora daudaun ne’e. Vasina ne’e hamenus ema-nia risku hetan infesaun, moras todan, baixa ka mate tanba COVID-19,” Deklarasaun konjuta ne’ebé Tatoli asesu liu hosi komunikadu, sesta ne’e.

Haree ba informasaun no evidénsia foun ne’ebé disponível, maka OMS ho MS kontinua avalia esforsu no responde sira hotu.

Nune’e, Komunidade-nia seguransa no protesaun maka  prioridade OMS ho MS iha kualkér aspetu hosi esforsu tomak.

Iha deklarasaun konjunta ne’e hateten katak, vasina COVID-19 ne’e iha oin ualu, ne’ebé hetan ona lisensa hosi OMS ba utilizasaun iha emerjénsia ka Emergency Use Listing (EUL).

Antes hetan aprovasaun husi OMS no ajénsia reguladór nasionál-sira, vasina COVID-19 sei liu teste rigorozu iha teste klíniku hodi prova katak, vasina hirak-ne’e atinji duni padraun internasionál ba seguransa no efikasia.

Vasina COVID-19 besik doze 200.000 mak administra ona iha Timor-Leste no seidauk rejista kazu efeitu sekundáriu sériu to’o ohin loron.

“Ida ne’e susesu boot ida ba ita ne’ebé mak maioria depende ba vasina AZ no ida ne’e hatudu prova tan vasina ne’e nia seguransa iha ita-nia populasaun,” komunikadu ne’e subliña.

Kona-bá seguransa vasina ne’ebé utiliza iha Timor-Leste, MS no OMS Timor-Leste hakarak salienta pontu balun hanesan tuir-mai:

Primeiru, OMS nia rekomendasaun provizoria atualizada no públika iha 21 abríl 2021, kategorikamente afirma tan katak, vasina Oxford AstraZeneca (AZ) prodús hosi fábrika oi-oin hodi hetan pre-kualifikasaun ba utiliza iha emerjénsia depende ba dadus klíniku prinsipál ba avaliasaun regulatória.  Nunee, vasina hirak-ne’e konsidera seguru no efetivu hodi utiliza.

Segundu, OMS iha rekomendasaun atu kontinua halo advokasia ba utiliza vasina AZ ba ema idade 18 ba leten.

Terseiru, iha rekomendasaun revizasaun Austrália-nian, vasina AZ sei kontinua atu administra ba ema idade 60 ba leten.

Kuartu, iha Austrália, ema ho idade 60 mai kraik, ne’ebé maka simu ona vasina doze AZ dahuluk, antes rekomendasaun foun iha fulan juñu, sei kontinua simu nafatin vasina AZ ba doze daruak (tuir rekomendasaun hosi autoridade regulatória Austrália.

Kintu, bazeia ba revizaun rekomendasaun hosi Austrália-nian, vasina AstraZeneca sei bele utiliza ba adultu idade 60 ba kraik, iha situasaun ne’ebé vasina alternativu la disponivel.

Sestu, depois konsidera status transmisaun moras COVID-19 no analize risku perigu-sira, nasaun seluk mós halo ona restrisaun idade ba utilizasaun vasina AZ iha grupu idade kiik, hanesan ezemplu, iha Reinu Unidu, idade limite maka 40.

Sétimu, iha nasaun ne’ebé maka virus COVID-19 da’et makaas, hanesan Timor-Leste, iha benefísiu imunizasaun ne’ebé bele prevene ema hosi hetan moras todan, baixa no mate tanba COVID-19, bo’ot liu kompara ho risku raru hetan moras Thrombotic Thrombocytopenic Syndrome (TTS) ka raan kafu’ak no baixa ospitál no mate tanba TTS.

Governu Austrália nia desizaun la muda Timor-Leste nia estratejia ba imunizasaun haree ba transmisaun komunidade atuál iha rai laran no posibilidade hetan variante COVID-19.

Ema sira ne’ebé seidauk simu vasina iha risku hetan moras COVID-19, baixa ospitál no mate. Importante tebes atu nota katak, efeitu adversu depois hetan imunizasaun AstraZeneca ne’e sei raru hela.

To’o ohin loron, seidauk iha kazu konfirmadu ba efeitu adversu depois hetan imunizasaun inklui mós TTS mésmuke vasina AZ doze 200.000 administra ona iha territóriu tomak.

“Ida ne’e susesu ne’ebé furak tebes la’ós de’it ba ita-nia komunidade nia unidade hodi proteje malu, maibé mós esforsu makaas hosi ita-nia ekipa imunizasaun sira hodi garante katak, vasina ne’e lori ba to’o duni iha komunidade nia le’et iha territóriu tomak ho maneira ne’ebé seguru,” Komunikadu ne’e haktuir tan.

Liután ida ne’e, médiku Timoroan-sira treinadu ho di’ak no ekipadu hodi bele halo tratamentu se iha insidente raru ruma akontese.

Bainhira halo ona konsultasaun ho péritu iha OMS nia laran no mós hosi fatin seluk,  konklui ho satisfatória katak, benefísiu hosi vasina AZ ne’e barak liu kompara ho-nia risku sira. Nunee, ho konfiansa apela atu kontinua nafatin utiliza vasina AZ.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here