TDD. Imajen Tatoli /Dok

DILI, 21 juñu 2021 (TATOLI)—Tribunál Distritál Dili (TDD), hala’o julgamentu ba kazu fraúde fiskál ne’ebé deskonfia komete hosi emprezáriu timoroan ida ho inisiál SG.

Tuir faktu akuzasaun hosi Ministériu Públiku (MP) ne’ebé Tribunál lee-sai katak, iha indisíu sufisiente hodi imputa krime ba ema sira ne’ebé pratika faktu deskreve tuir termu iha artigu 236 hosi kódigu prosesu penál katak, lei númeru  8/2008,  30 jullu regula kona-bá kualkér kompañia ne’ebé rejistadu no hala’o atividade komérsiu, tenke deklara rendimentu ba Estadu, hodi selu impostu kada fulan no anuál.

Notísia relevante:Aban, TDD hahú atende julgamentu normál

Arguidu SG na’in no diretór ba kompañia  ida ne’ebé rejista ho tipu Unipessoal Lda, hahú rejistu iha Diresaun Nasionál ba Impostu iha 30 jullu 2008 no iha altura ne’ebá Serbisu Rejistu Verifikasaun Emprezariál (SERVE) seidauk eziste.

Kompañia ida-ne’e hahú entrada iha sistema SERVE, iha 12 juñu 2013 ho númeru TIN 1157276 ho na’in nafatin arguidu 100%.

Kompañia Unipessoal Lda ne’e iha tinan 2008, 2009 no 2010 la relata rendimentu ba Estadu, nune’e Diresaun Nasionál Impostu aplika penalty ho totál $300 (kada tinan $100).

Dadus pagamentu hosi Free Balance hatudu katak, rendimentu kompañia refere iha  2009 mak hanesan, iha 17/04/2009, simu pagamentu ba fornesimentu uniforme hosi Ministériu Agrikultura ho totál pagamentu $13.225, iha 17/11/2009 simu pagamentu ba fornesimentu outru ekipamentu hosi Ministériu Agrikultura ho totál pagamentu $246.400.

Iha 13/12/2009, simu pagamentu ba fornesimentu uniforme hosi Ministériu Defeza no Seguransa ho totál pagamentu $189.996, iha  loron 31/12/2009  simu pagamentu ba produsaun livru hosi Ministériu Saúde ho totál pagamentu $48.000.

Relatóriu auditoria hosi Diresaun Nasionál Impostu ba kompañia ne’e katak iha 2009, kompañia tuir loloos tenke selu taxa rendimentu anuál ho totál $10.277,37 no 2010 $667,10  hosi rendimentu ne’ebé nia hetan iha tinan refere.

Dadus pagamentu hosi free balance hatudu katak, rendimentu kompañia ne’e iha 2011 hanesan  iha 06/06/2011 simu pagamentu ba fornesimentu meja no  kadeira hosi Ministériu Agrikultura ho totál pagamentu $24.000 no iha loron hanesan, simu mós pagamentu ba meja no kadeira hosi Ministériu Agrikultura ho totál pagamentu $ 4.000.

Relatóriu auditória hosi Diresaun Nasionál impostu iha 2011, kompañia loloos tenke selu taxa rendimentu anuál ba tinan refere ho totál $422.98 hosi rendimentu ne’ebé nia hetan iha tinan refere.

Dadus pagamentu hosi free balance hatudu katak, rendimentu kompañia  iha 2012, iha 15/05/2012, simu pagamentu ba sosa fini modo musan hosi Ministériu Agrikultura ho totál pagamentu $29.800.

Iha loron 20/06/2012, simu pagamentu ba sosa fini modo musan hosi Ministériu Agrikultura ho totál pagamentu $21.961.

Iha 21/08/2012, simu pagamentu ba kompra rádiu no komunikasaun hosi Ministériu Defeza no seguransa ho totál pagamentu $153.587, iha loron 20/11/2012, simu pagamentu ba sosa fini modo musan hosi Ministériu Agrikultura ho totál pagamentu $29.997,50.

Iha loron 24/12/2012, simu pagamentu ba sosa materiál defeza hosi Ministériu Defeza no seguransa ho totál pagamentu $65.555.

Iha 27/12/2012, simu pagamentu ba kompra de rádiu no komunikasaun hosi Ministériu Defeza no seguransa ho totál pagamentu $65.823.

Relatóriu auditoria hosi Diresaun Nasionál Impostu ba kompañia ne’e katak iha 2012 loloos tenke selu taxa rendimentu anuál ba tinan refere ho totál $10.197,96  hosi rendimentu ne’ebé nia hetan iha tinan refere.

Relatóriu auditoria hosi Diresaun Nasionál Impostu  iha tinan 2013, loloos tenke selu taxa rendimentu anuál ba tinan refere ho totál $14.125,96, no iha 2014 selu $ 2.996,55.

Iha  2015  tenke selu  $2.688,04 no  iha 2016 tenke $2.265,38 hosi rendimentu ne’ebé nia hetan iha tinan refere.

Nune’e totál taxa impostu ne’ebe kompañia ne’e tenke tenke selu ba Estadu hosi tinan 2009 to’o 2016 ho montante $43.641,34.

Hafoin auditoria, arguidu SG hanesan diretór no responsável ba kompañia selu tiha ona taxa dala tolu  mak hanesan,  iha 08/03/2018 selu taxa impostu ba tinan 2010 ho totál $ 667,10 no 2011 ho totál $ 422,98, iha 09/03/2018 selu taxa impostu ba tinan 2009 ho totál $10.277,37.

Totál taxa impostu ne’ebé kompañia selu tiha ona mak $11.367,45  hosi totál taxa ne’ebé tenke selu $43.641,34 nune’e taxa impostu sei falta  $33.256,06.

Konsekuénsia nesesariu hosi arguidu SG nia konduta, Estadu hetan prejuizu bo’ot ho montante $43.641,34 maske ikus mai selu tiha ona $11.367,45 maibé sei falta  $33.256,06 .

Arguidu hatene momos katak kualkér kompañia ne’ebé rejistu no hala’o atividade ekonomia iha obrigasaun atu deklara nia rendimentu ba Estadu, hodi selu impostu ba rendimentu maibé arguidu nunka deklara nia rendimentu ba Estadu.

Arguidu hatene momos katak deklarasaun rendimentu ba Estadu halo mensalmente no anualmente maibé arguidu nunka deklara nia rendimentu hahú hosi tinan 2009 to’o 2016.

Arguidu halo ho forma livre, deliberada no konsiente katak hahalok ne’ebé nia halo kontra lei maibé nia atua nafatin.

Ho nune’e arguidu hanesan autoria materiál ho forma konsumada komete krime fraude fiskál ne’ebé previstu iha artigu 314 númeru  2 hosi kódigu penál.

Liu hosi audénsia julgamentu, hodi hatán ba akuzasaun sira ne’e, arguidu SG, hateten  faktu  kona-bá taxa ne’ebé la selu loos hotu.

Nia esplika, razaun la selu iha momentu ne’ebá tanba  prosesu ne’e iha 2012-2016 ninian bainhira simu notifikasaun hosi Diresaun Nasionál Impostu atu submete dokumentu hodi halo auditoria la mensiona hosi 2009-2012 nian.

Nune’e iha 05 marsu 2018 rezultadu auditoria sai hodi notifika atu hahú halo pagamentu iha 08 marsu 2018.

Iha 28 marsu 2018 kompañia hatama rekursu ba iha diresaun impostu, tanba  rezultadu auditória atu selu taxa ne’ebé ho  kustu bo’ot, no diresaun impostu la konsidera dokumentu item balun ne’ebé kompañia submete hanesan rai ne’ebé kompañia sosa hodi utiliza ka  installa nia fatin hala’o atividade.

Tanba tuir nia, rai ne’e sosa hosi kompañia ho valór boot nune’e diresaun impostu bele konsidera selu taxa bele reduz.

Maibé iha iha 22 fevereiru 2019 rezultadu rekursu ne’e fó-sai katak, rai ne’e bele tau naran privadu maski rai ne’e tau kompañia  nia naran Unipesoal Lda la rekoñese.

Nune’e, nia kontinua halo rekursu segundu ba iha membru Governu tutela hanesan Ministru Finansa, administrativamentu iha momentu ne’eba ikus mai desizaun tun rezultadu hanesan de’it.

Iha 03 abríl 2019, Ministéiru Finansa liu hosi autoridade tributária jestaun kobransa halo akordu prestaun dívida impostu, atu kompañia selu kada fulan.

“Loron tuir-mai nu’udár diretór kompañia deside selu  kedan ba tinan tolu hodi simu mós sertidaun sívika iha tinan rua ikus ne’e konsege selu hotu ona tuir valór osan ne’ebé iha no dadaun ne’e laiha ona divída ruma,nune’e agora atividade empreza nian la’o normál iha área konstrusaun sivíl no suplay,’’ arguidu SG hateten iha sala audiénsia TDD, segunda ne’e.

Nia konsidera prosesu pagamentu ne’e tarde tanba hein rezultadu  rekursu ne’ebé hatama ba iha diresaun impostu hafoin tinan ida mak fó sai rezultadu.

Hafoin rona deklarasaun ne’e Tribunál deside adia fila-fali julgamentu ne’e ba iha loron 12 fulan jullu tinan ne’e iha tuku 11:00 otl hodi rona sasin sira seluk.

Prosesu julgamentu ne’e prezide hosi juiz koletivu, Argentino Neves, José Gonçalves, Albaro Maria Freitas no Ministériu Públiku reprezenta hodi prokuradór Anbronsio Rangel no arguidu hetan asisténsia legál hosi advogadu privadu Pedro Aparicio.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here