Motór adeptu futeból hamutuk 194 ne’ebé PNTL munisípiu Dili halo apreensaun durante jogu entre ekipa hosi nasaun Portugál ho França iha tasa Euro 2021, kuarta (23/06/21). Imajen Tatoli/Eugénio Pereira.

DILI, 24 juñu 2021 (TATOLI)—Polísia Nasionál Timor Leste (PNTL), munisípiu Dili hamutuk ho Diresaun Nasionál Tránzitu no Seguransa Rodoviária (DNTSR), halo tan apreensaun ba motorizada hosi adeptu futeból tasa Euro 2020, hamutuk 194 iha Dili.

Motorizada hirak ne’e PNTL halo apreensaun iha área 10 ne’ebé indentifikadu Timoroan-sira halo kovoi iha kuarta (23/06) lorokraik no kinta (24/06) madrugada, bainhira asiste jogu entre ekipa selesaun Portugál hasoru França ho rezultadu 2-2.

Notísia relevante:Jogu entre Portugál ho França, PNTL sei taka fatin sanulu

Adeptu hirak ne’ebé halo konvoi, maioria kontra sinais tránzitu hanesan, la uza kapasete, laiha karta kondusaun, laiha dokumentu, xapa matríkula no sobu asesores motór-nian.

“Hahú horisehik lorokraik to’o ohin madrugada, ita halo pasa revista iha fatin 10, no konsege prende evidénsia motorizada 149,” Komandante PNTL munisípiu Dili, Superintendente Xefe, Henrique da Costa, hateten ba jornalista-sira iha Komandu PNTL, Caicoli, kinta ne’e.

Superintendente Xefe, Henrique da Costa rekoñese katak, maski adeptu futeból barak mak halo protestu, maibé PNTL esplika ba sira kona-bá implementasaun lei, hodi garante sidade Dili bele la’o hakmatek.

“Ita hakarak ne’e limita alin sira ne’ebé gas motór halo barrullu ne’ebé bele kria fali problema liuliu hamosu krime, nune’e ita minimiza kedan ho asaun prevensaun,” nia subliña.

PNTL Dili mós agradese, tanba durante pasa revista, la identifika asidente ruma, no infratór-sira mós koopera di’ak tebes ho parte seguransa iha terrenu.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here