Membru PNTL hala’o patullamentu tama-sai bairru iha Dili, hodi asegura komunidade durante situasaun serka sanitária, kuarta (12/05/21). Imajen Tatoli/António Gonçalves.

DILI, 23 juñu 2021 (TATOLI)—Polísia Nasionál Timor-Leste (PNTL), munisípiu Dili koordena ona ho Diresaun Nasionál Tránzitu no Seguransa Rodoviária (DNTSR), atu halo operasaun iha área sanulu (10) iha Dili, ba adeptu futeból-sira labele halo konvoi durante jogu entre ekipa Portugál ho França iha taxa EURO 2021.

Tuir ajenda, jogu entre ekipa hosi nasaun rua sei hala’o iha kinta (24/06) tuku 4:00 madrugada no operasaun hosi PNTL sei hala’o hahú kuarta tuku 16:00 otl to’o kinta dader.

Notísia relevante:Jogu entre Portugál-Alemaña, polísia halo apreensaun ba motór 146

“Ekipa sei halo pasa revista iha fatin sanulu ne’ebe mak ita identifika ona hodi kontrola adeptu-sira hosi labele halo fali konvoi iha Dili,” Komandante PNTL Munisípiu Dili, Superintendente Xefe, Henrique da Costa, hateten ba jornalista-sira iha edifísiu Ministériu Interiór, Vila-Verde, kuarta ne’e.

Pasa revista ne’e, sei envolve membru polísia eskuadra-sira iha Dili no hetan apoiu hosi Batalliaun Orden Públiku (BOP) no Unidade Polísia Marítima (UPM).

Antes ne’e, iha jogu Portugál hasoru Alemaña,  PNTL halo apreensaun ba motorizada hamutuk 146 no rejista mós kazu asidente balun ne’ebé rezulta ema balun sofre kanek.

Alende ne’e, mosu mós konfrontu entre grupu joven iha suku Kuluhun, postu administrativu Cristo Rei, munisípiu Dili.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here