Vise-Ministru Administrasaun Estatal, Lino de Jesus Torezao. Imajen/Antonia Maia Gusmao.

DILI, 24 juñu 2021 (TATOLI)—Vise-Ministru Administrasaun Estatál (MAE), Lino de Jesus Torrezão, hateten iha tempu badak MAE sei aprezenta kandidatu Prezidente Autoridade Munisípiu (PAM) Dili na’in-haat (4) nia naran ne’ebé aprovadu ba Konsellu Ministru.

“Kandidatu PAM Dili hamutuk na’in-haat mak Guilhermina Filomena Saldanha ho valór 68, Abílio Mesquita “Mausoko”, Fernando Moniz Calau, Ivete Oliveira ho valór ne’ebé hanesan mak 66. Tempu badak, sira na’in-haat nia naran ita sei aprezenta ba Konsellu Ministru. Konsellu Ministru mak delibera no iha kompeténsia atu deside sé mak atu sai PAM Dili,” Lino de Jesus Torrezão hateten ba Agência TATOLI, liuhosi telefónika, kinta ne’e.

Kandidatu Prezidente Autoridade Munisípiu (PAM) Dili na’in-haat (4) sei iha prosesu diskusaun nia-laran no sei submete ba Konsellu Ministru maibé sei hein PAM Dili haruka kandidadtu sira-ne’e nia naran mai iha grupu tékniku Ministériu Administrasaun Estatál (MAE) nian.

Nia dehan, hafoin ne’e grupu tékniku MAE nian sei halo diskusaun depois haruka ba grupu interministerál sira halo apresiasaun mak bele submete ba konsellu konsultivu atu halo apresiasaun.

“Tempu badak, MAE sei submete ba Konsellu Ministru no Konsellu Ministru deside sé mak sei lidera PAM DILI, nune’e sira bele hala’o ona sira-nia servisu hanesan baibain,” nia dehan.

Prosesu rekrutamentu ba Prezidente Autoridade Munisipál (PAM) no Administradór Munisipál (AM) sira, bazea ba méritu la’ós intervensaun polítika, ne’ebé prevee iha dekretu Governu númeru 5/2016 nian katak, kandidatu sira prenxe kritéria mak hetan mellor klasifikada.

Antes ne’e, liuhosi ezame eskrita, kandidatu Prezidente Autoridade Munisipál Dili na’in-neen (4) mak tuir ezame eskrita maibé to’o ikus kandidatu na’in-haat (4) ne’ebé liu ona iha selesaun eskrita mak hanesan Guilhermina Filomena Saldanha ho valór ezame klasifikasaun kuantitativa 13.6 tanba resposta loos ba pergunta hamutuk 68.

Enkuantu kandidatu na’in-tolu seluk kompostu hosi Abílio Mesquita ‘Mausoko’, António Moniz Calau hetan valór hanesan 13.2 no Ivete de Fátima Sarmento de Oliveira, fó resposta loos ba pergunta hamutuk 66.

Nune’e mós, kandidatu na’in rua seluk ne’ebé ne’ebé la liu iha selesaun eskrita mak hanesan Sabino da Costa hetan valór 11.8 tanba fó resposta loos ba pergunta hamutuk 59, Manuel da Silva hetan valór 10 tanba fó resposta loos ba pergunta 50.

Notísia Relevante: Konsellu Konsultivu sei diskute kandidatu aprovadu ba PAM tolu-AM rua

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here