DILI, 24 juñu 2021 (TATOLI)—Komisaun Anti Korrupsaun (CAC sígla portugés), simu ona lista funsionáriu ho kargu xefia hahú hosi Diretór Jerál, Diretór Nasionál to’o Xefe Departamentu hosi instituisaun Estadu hamutuk 28, ba prosesu arrolamentu deklarasaun riku-soin no bens interese.
Instituisaun sira ne’e mak hanesan, Ministériu Obra Públika (MOP), Ministériu Ensinu Superiór Siénsia no Kultura (MSSK), Ministeiru Justisa (MJ), Institutu Apoiu Dezenvolvimentu Emprezariál (IADE), Bee Timor-Leste, Empreza Publika (BTL,EP), Eletrisidade De Timor-Leste Empreza Públika (EDTL,EP), Ajénsia Nasionál ba Akreditasaun Akadémika (ANAA sígla portugés), Autoridade Nasionál Petróliu Minerál (ANPM), Serbisu Rejistu Verifikasaun Emprezarial (SERVE), Timor GAP, EP, Serbisu Autónomu Medikamentu no Ekipamentu Saúde (SAMES), Ospital Referénsia Maliana, Ospitál Referénsia Maubessi, Fundu Dezenvolvimentu Kapital Umanu (FDCH), Autoridade Nasionál Komunikasaun (ANC), Ministériu Públiku Covalima, Institutu Jestaun Ekipamentu (IGE), Sekretáriu Estadu Joventude no Desportu (SEJD), Ministériu Finansa (MF), Prezidente Autoridade Munisípiu Ermera, Laboratóriu Nasionál Saúde, Ministériu Interiór (MI), Ministériu Prezidénsia Konsellu Ministru, Trade Invest, Autoridade Inspesaun Fiskalizasaun Alimentár Ekonomia no Sanitária (AIFAESA), Institutu Politékniku Betano (IPB), Tribunál Rekursu no Inspeksaun Traballu.
Notísia relevante:Deklara riku-soin, CAC simu ona lista hosi instituisaun hitu
Adjuntu Komisáriu CAC ba Asuntu Prevensaun no Sensibilizasaun, Luis Oliveira Sampaio, hateten hosi instituisaun 28 ne’e ho totál kargu xefia hamutuk 2.385 mak haruka ona sira-nia dokumentu mai iha CAC iha prosesu arrolamentu.
Oras ne’e daudaun, CAC liu hosi Diresaun ba Asuntu Prevensaun no Sensivilizasaun halo hela kompilasaun ba formuláriu ne’ebé prienxe ona hodi hatama ba sistema.
Antes ne’e CAC hasai notifikasaun iha nível Ministériu, Sekretária Estadu to’o Autoridade Munisipál hamtuk 66 no iha semana hirak liu-ba CAC hato’o tan notifikasaun ba instituisaun autonáma 25 ba prosesu arrolamentu.
Prosesu arollamentu ne’e sei hala’o to’o iha fulan ne’e nia rohan, ne’ebé instituisaun ida-idak sei aprezenta relatóriu informasaun kona-bá dadus pesoál, nune’e CAC hahú efetua serbisu ba instituisaun hira mak arroladu, hodi sujeita ba deklarasaun.
Tanba ne’e, sei halo arrolamentu ba dadus pesoál hosi instituisaun hotu-hotu, hafoin define mapeamentu instituisaun hira mak aplika uluk hodi deklara riku-soin.
Lei númeru 7/2020, 26 agostu kona-bá Medida Prevensaun no Kombate Korrupsaun (MPKK), tama ona vigór, iha 22 fevereiru 2021.
Lei MPKK prevee iha kapitulu II Regime de Declaraçao de Rendimentos, Bens e Interesses hosi artigu 27 to’o artigu 58.
Jornalista: Nelson de Sousa
Editór: Cipriano Colo
