Deputadu sira hosi Komisaun A PN hala'o diskusaun ba LAC iha iha Mukit Guest House Aisirimou Aileu, sesta (03/07/2020). Imajen/Mídia CAC.

DILI, 10 juñu 2021 (TATOLI)—Komisaun Anti Korrupsaun (CAC sígla portugés), simu ona lista funsionáriu ne’ebé ho kargu xefia hosi instituisaun Estadu hitu, ba prosesu arrolamentu deklarasaun riku-soin no bens interese.

Instituisaun sira-ne’e mak hanesan Ministériu Obra Públika (MOP), Ministériu Justisa (MJ), Eletrisidade de Timor-Leste Empreza Publika (EDTL,EP), Institutu Apoiu Dezenvolvimentu Emprezariál (IADE), Autoridade Nasionál Petróliu Minerál (ANPM), Bee Timor-Leste, Empreza Publika (BTL,EP) ho Ajénsia Nasionál ba Akreditasaun Akadémika (ANAA sílga portugés).

Notísia relevante:Fulan ne’e, CAC konklui faze alistamentu dadus kargu xefia

“Iha Ministériu rua no instituisaun autónoma lima mak haruka ona sira-nia lista mai iha CAC, ba prosesu arrolamentu,” Adjuntu Komisáriu CAC ba Asuntu Prevensaun no Sensibilizasaun, Luís Oliveira Sampaio, hateten ba jornalista Agência Tatoli, iha kna’ar fatin Praia dos Coqueiros, Dili, kinta ne’e.

Luis Oliveira, la esplika detallu kona-bá númeru kargu xefia hira mak CAC simu hosi instituisaun hitu ne’e, tanba sei iha prosesu hatama ba sistema.

CAC mos hein katak, ministeriu sira seluk ne’ebe seidauk submete lista, bele submete ona tanba prosesu arrolamentu ne’e sei termina iha fulan juñu nia-rohan.

Iha 14 maiu, CAC hasai notifikasaun iha nível Ministériu, Sekretária Estadu to’o autoridade munisipál hamtuk 66, hato’o mós notifikasaun ba instituisaun autónoma 25 ba prosesu arrolamentu ne’e.

Prosesu arrolamentu dadus pesoál ne’ebé instituisaun ida-idak sei aprezenta relatóriu informasaun, nune’e CAC hahú efetua serbisu ba instituisaun hira mak arroladu, hodi sujeita ba deklarasaun.

Tanba ne’e, sei halo arrolamentu ba dadus pesoál hosi instituisaun hotu-hotu, hafoin define mapeamentu instituisaun hira mak aplika uluk hodi deklara riku-soin.

Lei numeru 7/2020, 26 agostu kona-bá Medida Prevensaun no Kombate Korrupsaun (MPKK), tama ona iha vigór, iha 22 fevereiru 2021.

Lei MPKK prevee iha kapitulu II Regime de Declaraçao de Rendimentos, Bens e Interesses hosi artigu 27 to’o artigu 58.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here