Diretór Jerál AA/Alfándega, José António Fátima Abílio. Imajen TATOLI/Jogerjo Guterres

DILI, 18 maiu 2021 (TATOLI)—Durante fulan-haat nia laran Autoridade Aduaneira (AA)/Alfándega rekolla reseita doméstika liuhosi servisu alfandegáriu hamutuk millaun $12-resin.

“Hosi janeiru to’o abríl, ita konsege arrekada reseita millaun $12-resin de’it, maski normalmente iha fulan tolu ita bele rekolla liu millaun $15, maibé realidade ho pandemia COVID-19 ita la konsege to’o iha alvu ne’e,” Diretór Jerál  AA/Alfándega, José António Fátima Abílio, hateten ba Agência TATOLI iha edifísiu Ministériu Finansa (MF), Aitarak-laran, tersa ne’e.

Tuir nia, situasaun pandemia afeta tebes ba empreza sira atu halo importasaun ba nesesidade bázika.

“Reseita barak liu tama hosi portu, maibé volume movimentu terrestre kiik no durante situasaun emerjénsia hanesan COVID-19, fronteira terrestre loke semana ida dala-rua de’it, katak loron ida tama no loron ida sai,” nia akresenta.

Kontribuisaun reseita ba Orsamentu Jerál Estadu (OJE) kada tinan hosi AA, hanesan reseita doméstika barak liu kobre iha portu.

Iha parte seluk, maski situasaun COVID-19, Alfándega kontinua rekolla reseita liuhosi kontrolu atividade merkadoria, kontra bandu droga no ilegál sira, fasilita komérsiu no seluk tan.

“Ami kontinua serbisu tanba ita haree nesesidade bázika barak liu importa kompara ho produtu lokál,” nia hatutan.

Diretór rekoñese, Alfándega nia papél mak atu asegura nafatin sasán importasaun hosi empreza sira liuhosi prosesu libertasaun merkadoria tuir regra no protokolu saúde.

Iha situasaun atuál, volume importasaun menus tanba nasaun barak impoin konfinamentu, tanba ne’e afeta tebes ba empreza sira atu hatama sasán mai Timor-Leste.

“Ita haree importasaun menus automátikamente afeta ba reseita doméstika ne’ebé Alfandega  rekolla, maibé konsege rekolla  milaun $12-resin. Ita halo esforsu tomak hodi kontinua atividade ekonómika balun,” nia  subliña.

Biban ne’e, Diretór Jerál Alfándega, prefere halo alterasaun ba Lei Tributária.

“Ita hakarak diversifika impostu, tanba ne’e espera revizaun Lei Tributária liuliu kona-ba taxa bele fó kompeténsia ba Ministériu Finansa, atu kada tinan bele halo revizaun no projesaun tuir merkadu mundiál,” nia hatutan.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here