Koordenadora UPMA, Brígida Soares. Imajen TATOLI/António Gonçalves

DILI, 21 juñu 2021 (TATOLI)—Unidade Planeamentu, Monitorizasaun no Avaliasaun (UPMA) serbisu hamutuk ho Ministériu Finansa (MF) liuhosi Diresaun Nasionál Planeamentu Orsamentu hahú halo preparasaun ba Lei Orsamentu Jerál Estadu (OJE) tinan 2022.

“Preparasaun sei halo hosi Ministériu Finansa, hosi diresaun ne’ebé daudaun eziste, tanba ne’e ofisiál UPMA ne’ebé maioria servisu iha setoriál sei fó apoiu másimu ba Ministériu Finansa hodi prepara planeamentu ba orsamentu tinan oin,” Koordenadora UPMA, Brígida Soares, hateten, hafoin ramata reuniaun ho Primeiru-Ministru, Taur Matan Ruak, iha Rezidénsia Ofisiál Farol, segunda ne’e.

Natureza OJE 2022 mantein orsamentu bazeia ba programa, ne’ebé antes ne’e OJE 2021 iha programa hamutuk 145, maibé tanba desizaun polítika, maka sei redús programa balun.

“Ida-ne’e liga ho preparasaun orsamentu 2022 ninian, estrutura programátika kontinua la’o, ne’ebé sei iha mudansa oituan iha nível redusaun programa tanba desizaun polítika hateten katak, ita-nia programa daudaun iha tinan 2021 ne’e iha programa 145, tinan oin sei iha ezersísiu halo redusaun maizumentu hosi 23 to’o 50,” nia akresenta.

Daudaun ne’e, ezekusaun OJE 2021 atinje ona 30%, ne’ebé UPMA sei publika relatóriu ezekuzaun orsamentu ba públiku, nune’e bele akompaña progresu ezekusaun ne’e rasik.

“Bele haree iha planu rekuperasaun ekonómika, karik nia implementasaun iha tinan ida-ne’e kuaze maioria estudu sira-ne’ebé kada entidade propoin halo tinan oin mak foin iha implementasaun,” nia subliña.

Kalendáriu preparasaun OJE 2022

Bazeia ba kalendáriu ne’ebé Governu estabelese ona, preparasaun OJE 2022 hahú 31 maiu to’o 31 dezembru 2021.

Loron 07 maiu, hahú halo konsolidasaun no análize ba programa liña ministeriál, loron 11 juñu halo revizaun ba programa no indikadór ba OJE 2022 ne’ebé aliña ho indikadór sira hosi PRE no Objetivu Dezenvolvimentu Sustentável (ODS).

Nune’e, loron 18 juñu halo preparasaun ba planu makro-fiskál no planu kona-ba Opsaun Boot sira (GOP), loron 25 juñu halo sorumutuk ho parseiru dezenvolvimentu sira, loron 29 juñu Governu sei konvoka semináriu Jornada Orsamentál 2022 nian,  loron 07 jullu iha aprezentasaun no aprovasaun planu makro-fiskal no GOP hosi Konsellu Ministru, loron 14 jullu iha aprezentasaun no aprovasaun tetu fiskál no tetu dezagregadu husi Konsellu Ministru.

Iha loron 13 agostu iha submisaun proposta orsamentál sira liña ministeriál sira-nian, loron 20 agostu sei halo análize ba proposta orsamentál sira liña ministeriál sira no preparasaun pasta matak hosi MF, loron 10 setembru sei iha apresiasaun finál hosi Komité Revizaun Orsamentu Polítika( KROP).

Iha loron 17 setembru sei iha Konsellu Ministru ne’ebe aprova Proposta Lei (PPL) OJE 2022, loron 01 outubru Governu entrega PPL OJE 2022 ba Parlamentu Nasionál (PN), loron 30 novembru 2021 iha audiénsia sira entre Governu no PN.

Iha fulan-dezembru nia laran sei iha  debate iha PN kona-ba PPL OJE 2022 no dezembru 2021 nia laran sei iha promulgasaun OJE 2022 nian.

 Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here