PDHJ Bobonaro iha Soso, Maliana. Imajen Tatoli/Sérgio da Cruz.

BOBONARO, 23 juñu 2021 (TATOLI)—Hahú hosi janeiru to’o juñu, Provedoria Direitu Umanu no Justisa (PDHJ sígla portugés), unidade territória munisípiu Bobonaro, rejista keixa violasaun diretu umanu hamutuk sia (9) no boa governasaun hitu (7), totál 16.

Ditetór PDHJ Bobonaro, Domingos Pinto Tavares, esplika keixa hirak-ne’e barak liu maihosi komunidade hasoru entidade públiku-sira, maibé PDHJ fó ona notifikasaun ba keixa na’in-sira, no unidade territória  Bobonaro haruka ona ba nasionál.

Notísia relevante:OJE 2021, PDHJ ezekuta ona 36.7%

“Komunidade mai rejistu, primeiru ami fó karta notifikasaun katak, keixa ne’e ami rejista ona. Segundu, ami fó notifikasaun katak, keixa ne’e ami hato’o ba nasionál,” Domingos Pinto Tavares informa ba Agência Tatoli, iha knaar-fatin, Soso, Maliana, kuarta ne’e.

Diretór ne’e informa mós katak, durante ne’e PNTL no F-FDTL halo atuasaun ba komunidade ne’ebé kontra órden públika, respeita valór no prinsípiu direitu umanu, tamba seidauk simu keixa katak, polísia halo violasaun direitu umanus hasoru komunidade.

Nia husu ba komunidade no entidade tomak iha munisípiu Bobonaro atu respeita nafatin ema-nia integridade fízika no liberdade sirkulasaun, atu bele proteze direitu umanu inklui promove boa governasaun iha Timor-Leste.

Kona-bá kazu ne’ebé durante ne’e rejistadu, sei haruka ba diresaun asisténsia públika atu rejista no lori fali ba Komite Jestaun Kesar (KJK) hodi deside estatutu hosi kazu ne’e.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here