Provedór Adjuntu Boa Governasaun Direitu Umanu no Justisa, José Telo Soares Cristovão, lansa publikasaun relatóriu PDHJ nian iha salaun PDHJ, Caicoli, segunda (21/12). Imajen Tatoli/Egas Cristovão.

DILI, 24 maiu 2021 (TATOLI)—Provedoria Direitu Umanu no Justisa (PDHJ sígla portugés), ezekuta ona 36.7%, hosi Orsamentu Jerál Estadu (OJE) 2021, tuir Portál Transparénsia ne’ebé Agéncia Tatoli asesu, iha segunda (24/05).

Nune’e, gastu oríjen hamutuk $1.857.468, kompromisu $130.580.01, obrigasaun $137.269, atuál $545.266.23 no saldu $1.044.352.76.

Notísia relevante:Janeiru-maiu, PDHJ simu keixa 70

Provedora PDHJ, Jesuina Maria Ferreira Gomes, hateten rezultadu ezekusaun hosi orsamentu ne’e, atinjimentu programa ne’ebé realiza ona mak hanesan, halo  monitorizasaun ba implementasaun Estadu emerjénsia (EE) ho serka sanitária (SS) no konfinamentu obirgatóriu (KO), halo mós monitorizasaun ba distribuisaun Cesta Bazíka ho sira seluk, ne’ebé halo ona relatótiu ba Primeiru Ministru, Prezidente Repúblika no Prezidente Parlamentu Nasionál.

PDHJ mós halo investigasaun ba kazu boa governasaun no violasaun direitu umanu iha munisípiu Dili, hodi prodúz relatóriu investigasaun finál no simu keixa hodi halo notifikasaun ba kesar-na’in.

“Iha mós programa seluk halo revizaun ba manuál no kriasaun regulamentu internu foun, revizaun ba manuál treinamentu PNTL, manual formasaun ba guarda prizonál, revizaun planu estratéjiku 2021-2025 no mós partisipa enkontru virtuál internasionál,’’ Jesuina Maria Ferreira Gomes, hateten ba jornalista Agéncia Tatoli, segunda ne’e.

PDHJ iha difikuldade oitoan ba orsamentu iha  EE no serka sanitária, tanba Ministériu Finansa la autoriza atu prosesa adiantamentu ba atividade diresaun-sira, hanesan atividade promosaun no edukasaun, peskiza no monitorizasaun.

Distribuisaun notifikasaun ba kesar-na’in no investigasaun liliu iha munisípiu sira, labele realiza tanba EE ho SS.

Provedora Jesuina Maria hateten, iha segundu trimestre prioridade PDHJ nian maka kontinua hala’o monitorizasaun ba implementasaun EE, SS, KO ho programa Governu hanesan Cesta Bazíka ho sira-seluk hodi fó pareser no advokasia ba Governu liga impelementasaun.

Oras ne’e daudaun PDHJ kontinua halo prosesamentu ba tenderizasaun ne’ebé seida’uk hetan fornesedór, no hala’o prosesu selesaun pur méritu ba kargu diresaun no xefia, prepara relatóriu anuál 2020, hodi hatama iha Parlamentu Nasionál (PN) iha juñu, no halo revizaun estatutu PDHJ, ikus liu mak partisipa iha asembleia jerál  internationál Ombudsman Institute (IOI) ho virtuál.

Nia garante katak, orsamentu PDHJ sei ezekuta ho rigór ba objetivu tuir programa ne’ebé iha ona.

Tuir dotasaun OJE 2021 PDHJ prevee $1.857.468 hodi  koloka ba saláriu vensimentu $863.786, bens serbisu $896.482, kapitál minór $97.200 no kapitál dezenvolvimentu ho transferénsia públika laiha.

Medida prinsipál setoriál hosi PDHJ ba tinan 2021 mak tuir papél ne’ebé  maka, halo investigasaun, promosaun liu hosi treinamentu ba membru PNTL, F-FDTL, funsionariu públiku, guarda prizionál no halo fiskalizasaun simu keixa hodi halo rekomendasaun ho mós peskiza.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here