Prosesu pagamentu subsídiu idozu iha munisípiu Baucau, kuarta (23/06). Imajen TATOLI/Natalino Belo

BAUCAU, 23 juñu 2021 (TATOLI)–Koordenadór Banku Nasionál Komérsiu Timor-Leste (BNCTL, sigla portugés) munisípiu Baucau, Olímpio da Silva Pinto, husu benefisiáriu sira kumpre regra protokolu saúde ba prevensaun COVID-19 durante prosesu pagamentu subsídiu ba idozu no invalidez.

Munisípiu Baucau ohin hahú halo pagamentu ba benefisiáriu iha suku Bahu, postu admistrativu Baucau villa, munisípiu Baucau.

Koordenadór BNCTL munisípiu Baucau, Olímpio da Silva Pinto. Imajen TATOLI/Natalino Belo

“Banku nafatin orienta tuir protokolu saúde ne’ebé fó sai ona, signifika katak bainhira simu osan tenki uza máskara, fase liman beibeik, uza hand sanitizer, no tenke iha distánsia fíziku,” Koordenadór BNCTL hateten ba Agência TATOLI, iha suku Bahu, Villa antiga Baucau, kuarta ne’e.

Durante prosesu pagamentu, Koordenadór nota katak benefisiáriu balun kumpre regra prevensaun maibé balun lae.

Notísia relevante: Governu sei halo pagamentu ba idozu-inválidez iha 23 juñu

“Munisípiu Baucau implementa hela Serka sanitaria, entaun dalaruma buat hotu ita hakarak tuir duni dalan, maibé ema idaidak ho ninia karater, balun kumpre tuir protokolu, balun lae,” nia akresenta.

Benefísiariu sira forma atu simu subsídiu iha suku Bahu, postu administrativu Baucau villa, munisípiu Baucau, kuarta (23/06). Imajen TATOLI/Natalino Belo

BNCTL kuaze tinan-tinan sempre halo pagamentu tamba iha akordu kooperasaun entre Banku no Ministériu Solidariedade Sosiál no Inkluzaun (MSSI) inklui Ministériu Administrasaun Estatál (MAE), liuhosi autoridade postu no suku, nune’e pagamentu benefisiáriu nafatin la’o ho di’ak no seguru.

Tuir oráriu, pagamentu idozu iha postu Baucau villa, hahú hosi suku Bahu no sei finaliza iha suku Uailili iha loron 28 jullu 2021.

Totál benefisiáriu iha postu admistrativu Baucau villa hamutuk 4.527 hosi suku 11.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here