DILI, 16 juñu 2021 (TATOLI)—Governu liuhosi reuniaun Konsellu Ministru (KM), aprova projetu Rezolusaun Governu ne’ebé estabelese komisaun interministeriál ba reajustamentu Planu Estratéjiku Dezenvolvimentu (PED) tinan 2011-2030.
Diploma ne’e aprezenta hosi Vise Primeiru-Ministru no Ministru Planu Ordenamentu, José Maria dos Reis.
“Liu ona tinan 10 implementasaun Planu Estratéjiku Dezenvolvimentu tinan 2011-2030 nian, Governu hakarak halo ajustamentu filafali ba dokumentu estratéjiku ida-ne’e ein termu estruturamente no kondutór hosi prosperidade nasionál, liuhosi estratéjika integrada ida, inkluziva no reziliente,” Ministru Prezidénsia Konsellu Ministru, Fidelis Manuel Leite Magalhães, hateten, hafoin reuniaun ezekutivu iha salaun auditóriu Ministériu Finansa, kuarta ne’e.
Notísia relevante: Governu sei halo reajustamentu ba dezenvolvimentu estratéjiku
Nune’e mós, Governu konsidera reajustamentu ne’e bele viabiliza artikulasaun no kreximentu setór oioin, hodi permite dezenvolvimentu sosiál no ekonómiku umanu ba país
“Reajustamentu ida-ne’e iha konsiderasaun hanoin hikas estratéjika hosi médiu no longu prazu nian, atu hasoru dezafiu hanesan daudaun ita infrenta, hanesan pandemia COVID-19 no dezastre naturál sira,” Portavóz Governu esplika.
Aleinde ne’e, inisiativa ne’e mai ho objetivu no meta sira ne’ebé prevee iha Planu Rekuperasaun Ekonómika.
Jornalista : Antónia Gusmão
Editora : Julia Chatarina
