Ministru Defeza, Filomeno de Jesus Paixão. Imajen/António Gonçalves

DILI, 22 juñu 2021 (TATOLI)—Ministru Defeza no Seguransa, Filomeno de Jesus Paixão, hateten rekrutamentu F-FDTL foun tama ona ba faze apuramentu ba kandidatu 2.400.

Notísia Relevante: Lere Anan Timur relata rekrutamentu F-FDTL ba PR

“Agora daudaun rekrutamentu to’o ona iha faze apuramentu ba kandidatu 2.400 no agora ita halo teste psikosomátiku (psyche=hanoin no soma=isin) no psikofíziku para atu hetan kandidatu 600 hosi 2.400 ne’e,” Filomeno de Jesus Paixão hateten ba jornalista sira hafoin hasoru malu ho Prezidente Repúblika, Francisco Guterres Lú Olo, iha Palásiu Prezidensiál Nicolau Lobato, Bairru Pite, Dili, tersa ne’e.

Nia hatutan, teste no kursu sira-ne’e durante ne’e la’o di’ak tantu iha rekursu umanu no rekursu lojístiku hotu, nune’e iha fulan ne’e nia-laran bele ramata prosesu apuramentu ba kandidatu 600 ne’e.

Kona-ba farda no arma inklui ekipamentu no kondisaun, Ministru Defeza hateten buat hotu iha ona prosesu no sei ramata iha fulan agostu nia-laran.

Aleinde ne’e, nia parte informa ba Prezidente Repúblika kona-ba dezenvolvimentu portu navál Hera liu-liu oinsá bele hala’o konstrusaun ne’ebé hamutuk ho Austrália tanba Austrália fó apoiu trakasaun rua ba iha ró rua ne’ebé sei mai iha 2023.

“Prezidente Repúblika mós diretiva ba preparasaun atu aumentu portu navál Hera para ita atraka tan ita-nia ró ida ka rua hodi halo parte ba Austrália nia apoiu, nune’e halo patrullamentu iha norte no súl nian. Agora daudaun halo hela akordu doasaun ho Austrália, depois mak halo konstrusaun fízika,” nia dehan.

Notísia Relevante: Governu planeia konstrui portu navál Hera iha tinan oin

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here