Diresaun Nasionál Tránzitu no Seguransa Rodoviária (DNTSR) hamutuk ho Komandu PNTL Dili, halo apreensaun ba motór 146, iha domingu (20/06), bainhira adeptu futeból-sira konvoi, iha jogu tasa Euro 2021 entre Portugál ho Alemaña. Imajen Tatoli/Eugénio Pereira.

DILI, 21 juñu 2021 (TATOLI)—Diresaun Nasionál Tránzitu no Seguransa Rodoviária (DNTSR) hamutuk ho Komandu PNTL Dili, halo apreensaun ba motór 146, iha domingu (20/06), bainhira adeptu futeból-sira  konvoi, iha jogu tasa Euro 2021 entre Portugál ho Alemaña.

Komandante PNTL Munisípiu Dili, Superintendente Xefe, Henrique da Costa, hateten motór hirak-ne’e polísia halo apreensaun iha área kapitál Dili.

Notísia relevante:PNTL bandu halo konvoi durante jogu tasa Euro

“Ita halo pasa revista envolve ekipa 10 ne’ebé fahe ba área 10 ita serka movimentu transporte no halo pasa revista hahú hosi tuku sábadu 16:00 to’o domingu tuku 2:00 madrugada, prende motorizada hamutuk 146,” Superintendente Xefe, Henrique da Costa hateten ba jornalista-sira iha Komandu PNTL, Caicoli, segunda ne’e.

Motorizada hirak-ne’e hetan apreensaun, tanba infratór-sira laiha karta kondusaun, dokumentu laiha, motorizada uza kanu resin, sobu asesores, la uza kapasete no kontra sinais tránzitu.

Hafoin halo apreensaun, ekipa lori kedan motór-sira ba komandu Munisípiu Dili hodi halo rejistu no pasa kedan karta infrasaun ba infratór-sira atu seluk multa iha banku tuir lei.

PNTL rejista mós rejista motór-na’in sira ka adeptu futeból sira iha balun ne’ebé kondús motór ho kondisaun lanu.

PNTL intensifika operasaun

Ohin, komandante Polísia Nasionál Timor Leste (PNTL), Munisípiu Dili, Superintendente Xefi, Henrique da Costa no Segundu Komandante, Superintendente Polisia, Euclides Belo, hala’o enkontru ho Komandante Tránzitu Dili hodi fó orientasaun atu intensifika operasaun iha  Dili hodi kontrola abitante ne’ebé kondús transporte viola kódigu estrada.

Hafoin enkontru iha Komandu PNTL, Caicoli, Superintendente Polisia, Euclides Belo, dehan polisia tránzitu sei hasa’e volume operasaun hodi regulariza seguransa rodoviaria no hadi’a di’ak liután serbisu iha ekipa ho forma ida efikás, atu nune’e bele dezempeña ba asaun sira ho profisionál.

Iha enkontru ne’e, Komandu PNTL Dili kontinua habelar informasaun ba membru sira atu sensibiliza nafatin rezolusaun ba regra Estadu Emerjénsia no Serka Sanitaria ne’ebe Governu dekreta ona hodi implementa.

“Orientasaun komandu hato’o ba komandante-sira no ba membru tomak katak, tenki garante Dili hakmatek ba ema tomak, la bele iha ema ida impede ema seluk nia liberdade, ida ne’e labele akontese, tanba iha ita-nia konstituisaun artigu 44 nian garantia ema nia liberdade no seguransa,” nia apela.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here