Estudante UNTL forma hela hodi simu Vasina Sinovac iha kampus Caicoli, segunda (14/06/21). Imajen Tatoli/António Gonçalves.

DILI, 23 juñu 2021 (TATOLI) – Institutu Boaventura Timor-Leste (IBTL)  aprezenta ona proposta ba Ministériu Saúde (MS) atu bele fasilita vasina ba alun-sira, korpu dosente ho funsionáriu administrativu IBTL nian.

Notísia Relevante : UNDIL hein despaixu Governu no ISC fasilita estudante vasina

“Ami hakarak komunidade edukativa iha IBTL hamutuk iha fatin ida depois maka MS mai fó vasina ba ami hotu, nune’e ami mós bele hetan dadus fiksu kona-ba ami nia ema-sira simu ona vasina,” Reitora  IBTL, Quiteria da Costa, hateten ba Agência Tatoli liuhosi telefónika, kuarta ne’e.

Quiteria da Costa, informa IBTL iha dosente na’in- 40, funsionáriu 20 no estudante 170, maibé foin mak 2% simu vasina. Tan ne’e, nia husu ba dosente, funsionáriu no estudante-sira hotu tenke prontu atu vasina.

Proposta ne’ebé IBTL aprezenta ona ba MS to’o agora seidauk iha resposta tanba ne’ sira mós hein de’it atu tempu besik bele halo vasina ba funsionáriu, korpu dosente ho estudante-sira.

Jullu, IPDC re-ativa aula prejensiál

Hosi sorin seluk, Reitora Institutu Profisionál de Canossa (IPDC), Madre Ervina Martins Brito garante katak, iha jullu 2021, IPDC sei re-ativa aula prejensiál. Tanba ne’e IPDC halo esforsu másima atu korpu dosente, funsionáriu no estudante-sira hotu simu vasina.

“Ami nia dosente na’in-10, funsionáriu na’in-neen (6) hahú vasina, horisehik, no  fiar katak juñu remata ami-nia komunidade edukativa sira bele simu hotu ona vasina,” Madre Ervina Martins Brito hateten.

Jornalista : Tomé Amado

Editór        : Francisco Simões

HAKEREK NO HATÁN

Please enter your comment!
Please enter your name here