Diresaun Nasionál Prevensaun Konflitu Komunitária (DNPKK), fó formasaun ba estrutura Suku Bairru-Pité, kinta (17/06/21). Imajen/DNPKK.

DILI, 17 juñu 2021 (TATOLI)—Sekretária Estadu Protesaun Sivíl (SEPS), liu hosi Diresaun Nasionál Prevensaun Konflitu Komunitária (DNPKK), serbisu hamutuk ho Plan Internasional Timor-Leste (PITL), fó formasaun ba estrutura suku Bairru-Pité, postu administrativu Dom Aleixo, munisípiu Dili.

Formasaun ne’e ko’alia kona-bá, protesaun labarik, matadalan mediasaun sensível ba jéneru, jestaun emosaun, prevensaun no rezolusaun konflitu ho objetivu atu eleva koñesimentu no abilidade membru estrutura suku, hodi fasilita serbisu atu atende komunidade.

Notísia relevante:Plan internasionál fó apoiu emerjénsia ba vítima dezastre naturál

Diretór DNPKK, António Viegas, hateten formasaun ne’e importante no bele sai nu’udár referénsia ba membru estrutura suku durante implementasaun serbisu iha terrenu.

“Ha’u fiar katak, autoridade-sira fila bele implementa iha ida-idak nia aldeia, tanba ita boot-sira mak hasoru komunidade, ita-boot sira mak buka solusaun ba problema ne’ebé akontese iha terrenu,” Antonio Viegas, hateten liu hosi komunikadu ne’ebé Agéncia Tatoli asesu, kinta ne’e.

DNPKK  konsidera ho meiu ne’e bele promove unidade iha serbisu hamutuk entre polísia, autoridade lokál iha prosesu identifikasaun no redús konflitu iha komunidade nia leet.

Xefe Suku Bairru-Pite, João da Costa Belo, agradese ba  DNPKK ho Plan International ne’ebé iha planu di’ak, liuliu oferese treinamentu ba membru suku-sira.

Autoridade lokál ne’e konsidera formasaun ne’e hanesan pasu ida ne’ebé bele kontribui informasaun no eleva koñesimentu estrutura suku atu bele hala’o serbisu ho loloos iha ida-idak nia aldeia.

Tuir planu, formasaun ne’ebé hala’o iha sede suku Bairru Pite  hahú ohin,  sei hala’o durante loron rua, tanba hetan fundu hosi Plan Internasional ho planu anuál, foka liu ba munisípiu Dili, Aileu no Ainaro.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here