Benefisiáriu ba idozu no invalidés iha Nitibe simu subsídiu hosi BNCTL. Imajen/Mídia MSSI-RAEOA.

OÉ-CUSSE, 23 JUÑU 2021 (TATOLI)—Banku Nasionál Timor-Leste (BNCTL, sigla portugés) sukursál Rejiaun Administrativa Espesiál Oé-Cusse Ambeno (RAEOA), kuarta ne’e hala’o pagamentu direta ba benefisiáriu subsídiu ba idozu-invalidés inklui bolsa da mãe primeira faze tinan 2021 iha sub-rejionál Nitibe.

Notísia Relevante: Benefisiáriu subsídiu ba idozu-invalidés iha RAEOA 6.471

Koordenadór BNCTL sukursál RAEOA, Eosman de Sousa. Imajen Tatoli/Abilio Elo Nini.

“Ita-nia pagamentu ba idozu no invalidés, ohin hahú uluk iha sub-rejiaun Nitibe konsentra iha suku Usitaco ho totál benefisiáriu hamutuk 1.286. Tanba pandemia COVID-19, banku fó trajetu loron ida-ne’e sei atende de’it ema na’in-200,” Koordenadór BNCTL sukursál RAEOA, Eosman de Sousa, informa ba Agência TATOLI, iha nia servisu fatin, bairu Santa Roza, suku Costa, sub-rejiaun Pante Makasar, kuarta ne’e.

Nia informa, aleinde halo pagamentu subsídiu ba idozu no invalidés iha RAEOA, BNCTL mós halo pagamentu subsídiu ba bolsa da mãe tanba iha tinan 2020 iha problema ho dadus no pendent, nune’e ohin foin mak hahú fila-fali halo pagamentu hamutuk ho benefisiáriu ba idozu no invalidés sira.

Maneira pagamentu ne’e, nia dehan, BNCTL mós fasilita meiu seluk hanesan uza ATM atu hafasil benefisiáriu sira, maibé hirak ne’ebé vulneravél labele partisipa direta iha pagamentu ne’e maibé reprezentante família bele simu.

“BNCTL fó autorizasaun, reprezentante família bele foti maibe tenke iha karta koñesimentu hosi autoridade lokál nomós hetan autorizasaun mós hosi MSSI, atu nune’e labele hamosu problema iha prosesu pagamentu,” nia hateten.

Iha parte seluk, Xefe Departamentu Minstériu Solidariedade Sosiál no Inkluzaun RAEOA, Adelino Cau, hateten MSSI distribui ona oráriu pagamentu ba iha lideransa suku sira atu mobiliza ferik-katuas (idozu) prepara iha ida-idak nia sub-rejiaun.

“Pagamentu ne’e fazeadamente, hahú uluk iha sub-rejiaun Nitibe. Segundu mak ba sub-rejiaun Pasabe, terseiru mai sub-rejiaun Oésilo no ensera iha iha sub-rejiaun Pante Makasar. Oráriu pagamentu fiksa ona. Se bainhira iha mudansa ruma, ami sei informa direta ba iha lideransa suku sira,” nia dehan.

Entretantu, totál dadus benefisiáriu subsídiu ba idozu no invalidés iha RAEOA hamutuk 6.471, kompotu hosi sub-rejiaun Nitibe 1.286, sub-rejiaun Pasabe 733, sub-rejiaun Oésilo 1394 no sub-rejiaun Pante Makasar 3.058, no totál benefisiáriu ba bolsa da mãe hamutuk 4.512

Jornalista : Abilio Elo Nini

Editor       : Cancio Ximenes

HAKEREK NO HATÁN

Please enter your comment!
Please enter your name here