Xefe Departamentu Ministériu Solidariedade Sosiál no Inkluzaun (MSSI) RAEOA, Adelino Cau. Imajen Tatoli/Abilio Elo Nini.

OÉ-CUSSE, 16 juñu 2021 (TATOLI)—Xefe Departamentu Ministério Solidariedade Sosiál no Inkluzaun (MSSI) RAEOA, Adelino Cau, informa benefisiáriu ba idozu-invalidés iha RAEOA hamutuk 6.471 ne’ebé hein hela atu simu pagamentu ba primeiru etapa iha tinan 2021

Notísia Relevante: 20 juñu, hahú pagamentu ba idozu no ema ho difisiente

“Totál benefisiáriu hamutuk 6.471 iha RAEOA ne’e hotuhotu hein de’it ona atu BNCTL taka nia orariu kada suku hodi hala’o pagamentu. Sira-nia dokumentu prepara ona, hein atu simu de’it ona,” Adelino Cau informa ba Agência TATOLI, iha nia servisu fatin, Santa Rosa, kuarta ne’e

Hosi totál benefisiáriu ne’e, kompostu hosi totál benfisiariu iha postu administrativu Pante Makasar 3.058, postu administrativu Oésilo 1394, postu administrativu Pasabe 733, no postu administrativu Nitibé 1.286

Atu halo pagamentu, nia dehan, daudaun ne’e nia parte seidauk hatene kalendáriu hosi BNCTL atu fó sai avizu loloos katak bainhira mak atu selu, tanba babain ne’e kalendáriu hosi banku mak determina pagamentu.

Modelu atu halo pagamentu ne’e sei konsentra iha postu administrativu sira, tanba hosi MSSI oferese karreta ida ba iha banku atu uza karreta ne’e ba hala’o pagamentu iha baze.

Aleinde ne’e, nia informa, totál benefisiáriu ba bolsa da mãe iha RAEOA hamutuk 4.512 maibé foin dadauk lista pagamentu ba bolsa da mãe iha failansu ba lista naran pendente sira.

“Oras ne’e, MSSI RAEOA hadia tiha ona lista naran pendente sira no haruka ona ba iha ministériu finans atu aloka osan ba BNCTL. Iha tempu badak, sei hala’o hikas pagamentu hanesan mós ho idozu no invalidés sira,” nia dehan.

Jornalista: Abilio Elo Nini

Editór: Cancio Ximenes

HAKEREK NO HATÁN

Please enter your comment!
Please enter your name here