Edifísiu Polísia Nasionál Timor Leste (PNTL), munisípiu Bobonaro. Imajen Tatoli/Sérgio da Cruz.

BOBONARO, 15 juñu 2021 (TATOLI)—Polísia Nasionál Timor-Leste (PNTL) Munisípiu Bobonaro, enfrenta difikuldade ba transporte, atu hala’o serbisu prevensaun transmisaun COVID-19, hamutuk ho ekipa vizilánsia, iha munisípiu ne’e.

Segundu Komandante PNTL Munisípiu Bobonaro, Superintendente António Mau-Luta, hateten Komandu munisipál iha de’it karreta ida ne’ebé fó apoiu ba ekipa saúde, hodi halo vizilánsia no halo sosializasaun ba prevensaun COVID-19.

Notísia relevante:Bobonaro preparadu simu vasina AstraZeneca doze daruak

“Ami apoia ema ne’ebé pozitivu no mós atu ba halo teste swab. Alende ne’e ami presija apoiu mós Sentu Integradu Jestaun Krize hodi halo sosializasaun. Iha serbisu barak, maibé karreta ida de’it difikulta tebes ami,” Superintendente António Mau-Luta, hateten ba jornalista Agência Tatoli iha serbisu fatin, tersa ne’e.

Nia esplika, durante ne’e serbisu barak liu utiliza karreta Komandante munisípiu-nian no mós adjuntu komandante nian hodi fasilita membru-sira ba fó apoiu ba prevensaun COVID-19.

Totál membru PNTL munisípiu Bobonaro ne’ebé kolokadu ba apoia ekipa vizilánsia no prevensaun COVID-19 hamutuk na’in-ualu.

Membru efetivu iha na’in 150 no simu ona vazina AstraZenaca, na’in 20 mak seidauk simu no tuir planu sei simu iha tempu badak.

Parte  Komandu munisípiu Bobonaro husu ba populasaun bainhira  ekipa saúde detekta pozitivu, atu koopera ho parte saúde no seguransa, nune’e bele kombate kontáziu hosi vitrus ne’e.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here