Ministru MAE, Miguel Pereira de Carvalho, hatuur fatuk inan ba projetu harii uma kbiit-laek iha Aldeia Uatulioli, Suku Loi Ulu, Postu Administrativu Uatucarbau, Munisípiu Viqueque, tersa (22/06/2021). Imajen Tatoli/Vitorino Lopes da Costa

VIQUEQUE, 22 juñu 2021 (TATOLI)-Ministru Administrasaun Estatál (MAE), Miguel Pereira de Carvalho, tersa (22/06), ofisiálmente hatuur fatuk-inan ba projetu harii uma kbiit-laek iha Aldeia Uatulioli, Suku Loi Ulu, Postu Administrativu Uatucarbau, Munisípiu Viqueque.

Notísia Relevante :  21 juñu, PNDS hatuur fatuk-inan ba uma kbiit-laek

Iha serimónia ne’e, Ministru Miguel  Pereira, hateten, konstrusaun uma ba kbiit-laek ne’e korresponde ho Planu Estratéjiku Dezenvolvimentu Nasionál (PEND) 2011-2030 ne’ebé rekoñese povu Timor-Leste nia aspirasaun atu harii nasaun ida ne’ebé forte, prósperu no moris di’ak.

Liuhosi konstrusaun uma ba kbiit-laek, Governu bele garante katak ema hotu hetan oportunidade atu hetan rai no uma ida hodi bele tulun hala’o nia moris ho dignu no seguru.

Iha tinan fiskál 2021, Governu  harii uma kbiit-laek hamutuk unidade 1.254 iha suku 424 ho totál orsamentu $25.000.000 ho kustu ba kada uma purvolta $14.000 to’o $17.000.

Uma ne’ebé atu konstrui kompostu husi tipu ka modelu rua; tipu 48m2 ne’ebé sei inklui kuartu tolu, sala vizita ida no dapur ida; no tipu 37 m2 ne’ebé sei inklui kuartu rua, sala vizita ida no dapur ida.

Oinsá determina benefisiáriu ka ema ne’ebé merese atu hetan uma kbiit-laek, Ministru Miguel Pereira, hateten kandidatu benefisiáriu ka ema kbiit-laek mai hosi suku no aldeia ne’ebé prepara hosi asembleia aldeia.

Rekizitu importante  rua ne’ebé tenke konsidera no fó atensaun maka’as molok foti desizaun foti maka tenke asegura katak kandidatu benefisiáriu ema kbiit-laek duni no tenke asegura katak nia iha nian rain rasik, atu labele iha problema kona-bá fatin bainhira tama ba faze konstrusaun ka harii uma ba kbiit-laek.

Uma ba kbiit-laek ne’ebé atu harii iha Munisípiu Viqueque ba kbiit-laek sira hamutuk unidade 108, kompostu hosi Postu Administrativu Lacluta uma 12, Ossu (30), Uatulari (18), Uatucarbau (18) no Viqueque Vila  iha uma 30.

Jornalista       : Vitorino Lopes da Costa
Editór             : Francisco Simões

HAKEREK NO HATÁN

Please enter your comment!
Please enter your name here