VIQUEQUE, 16 juñu 2021 (TATOLI)- Ekipa Programa Nasionál Dezenvolvimentu Suku (PNDS) marka ona ajenda tentativa, segunda (21/06), halo lansamentu hatuur fatuk-inan ba projetu harii uma kbiit-laek iha Munisípiu Viqueque.
Notísia Relevante : PNDS halo sosializasaun fundu RKRE ba autoridade lokál
Diretór PNDS Munisípiu Viqueque, Estevão de Carvalho, informa preparasaun ba lansamentu hatuur fatuk-inan ba uma kbiit-laek preparadu ona no espera katak ajenda tentativa ne’e realiza ho di’ak.
“Lansamentu hatuur fatuk-inan ba uma kbiit-laek sei hala’o iha Postu Administrativu Uatucarbau, Suku Lui-Ulu,” Estevão de Carvalho hateten ba Agênsia Tatoli iha edifísiu PNDS, Viqueque, kuarta ne’e.
Kona-bá preparasaun tékniku la’o hela no daudaun iha faze aprizionamentu no ekipa PNDS distribui ona kotasaun ba suku sira hodi identifika kompañia sira ne’ebé sai fornesedór materiál fábrikadu no la’ós fábrikadu ba konstrusaun uma kbiit-laek.
Iha Munisípiu Viqueque sei harii uma kbiit-laek’ hamutuk 108, kompostu Postu Administrativu Ossu iha suku 10 sei hetan uma kbiit-laek 30, Postu Viqueque Vila hamutuk 30, postu Uatulari suku neen (6) sei hetan uma 18, postu Lacluta sei hetan uma 12 no postu Uatucarbau uma 18.
Jornalista : Vitorino Lopes da Costa
Editór : Francisco Simões
