Ministru MAE, Miguel Pereira de Carvalho, inaugura estrada rurál iha Suku Afaloicai, Postu Uatucarbau, Munisípiu Viqueque, tersa (22/06/2021). Imajen Tatoli/Vitorino Lopes da Costa

VIQUEQUE, 22 juñu 2021 (TATOLI)-Estrada rurál ho distánsia kilómetru ida (1km) iha Suku Afaliocai, Postu Administrativu Uatulari, Munisípiu Viqueque,  tersa (22/06), ofisiálmente inaugura hosi Ministru Administrasaun Estatál (MAE), Miguel Pereira de Carvalho.

Notísia Relevante : MAE hatuur fatuk-inan ba konstrusaun uma kbiit-laek iha Uatucarbau

“Ha’u mai inaugura estrada rurál ne’ebé iha aldeia laran ne’e  kompletu ho ninia drainazen no valeta. Estrada ne’e konstrui hosi Programa Nasionál Suku (PNDS) ne’ebé fó benefísiu ba abitante sira hamutuk 700-resin no fó empregu mós ema 700,” Ministru Miguel Pereira de Carvalho hateten iha ámbitu serimónia inaugurasaun estrada rurál ne’e iha Afaloicai.

Ministru Miguel Pereira Carvalho afirma programa sira ne’e importante tebes atu Governu realiza hodi tuluk rekuperasaun ekonomia, liuliu iha situasaun pandemia COVID-19.

Governante ne’e dehan, Governu komprometidu atu garante katak programa PNDS sei implementa iha fatin hotu, la’ós iha tinan ida ne’e de’it, maibé  tinan oin kontínua ba beibeik.

Estrada rural ne’ebé liga iha Suku Afaloicai laran ho distánsia kilómetru  ida (1km) ho nia medida  luan metru tolu (3m) ho fundu hosi PNDS $48.000.

MAE inaugura  mós estrada Loi Ulu

Komunidade Lui Ulu. Imajen Tatoli/Vitorino Lopes da Costa

Iha biban ne’e, Ministru Administrasaun Estatál (MAE), Miguel Pereira de Carvalho, halo mós inaugurasaun ba estrada rurál iha Suku Loi Ulu, Postu Administrativu Uatukcarbau, Munisípiu Viqueque.

Diretora Nasionál Programa Nasionál Dezenvolvimentu Suku (PNDS), Claudiana Soares Pinto,  relata katak estrada rurál ba Suku Lui Ulu ne’e hetan fundu hosi Governu Austrália iha tinan 2019  liuhosi fundu Reziliénsia Komunitária Rekuperasaun Ekonomia (RKRE) ho montante $36.268.25.

“Ita halo inaugurasaun estrada rurál iha Suku Loi Ulu, hodi fasilita komunidade sira hosi aldeia tolu,” Claudiana Soares Pinto, hateten.

Claudiana hatutan, estrada agora seidauk to’o iha komunidade hosi aldeia tolu tanba foin mak metru 700 no presiza tan  metru 100.

Xefe Suku Loi Ulu, José Luis da Silva, hateten  estrada ne’e liga ba aldeia Deni Hare, Louaba, no Aldeia Asafa Dae hodi  benefisia abitante 680, mezmu estrada ne’e rasik seidauk hotu.

Projetu konstrusaun estrada ne’e envolve direta komunidade Suku Loi Ulu ne’ebé jere rasik hosi Ekipa Jestaun Suku (EJS) kada loron  selu traballadór $5.00 kada ema no badae selu $5.00 kada metru.

Jornalista       : Vitorino Lopes da Costa
Editór             : Francisco Simões

HAKEREK NO HATÁN

Please enter your comment!
Please enter your name here