Prosesu deskargamentu mina ba sentrál elétrika Betano. Imajen/Timor GAP

DILI, 22 juñu 2021 (TATOLI)-Prezidente Konsellu Administrasaun Eletricidade de Timor-Leste (EDTL, E.P), Paulo da Silva, hateten, Timor Gás no Petróleu, Empreza Públika (Timor GAP, E.P) konklui ona deskargamentu fornesimentu kombustível ba sentrál elétrika Betano.

“Ita koopera ho Timor GAP hodi konklui ona deskargamentu mina armazen hamutuk litru millaun $16 resin iha faze dahuluk, ne’ebé ita hein fali faze daruak tuir kontratu,” Prezidente Konsellu Administrasaun  hateten ba Agência TATOLI, iha ninia knaar fatin, Caicoli, tersa ne’e.

Notísia relevante: Timor GAP, E.P hahú fornese kombustível ba sentrál elétrika Betano

Tuir nia, faze dahuluk fornesementu ne’e tarde oituan, maibé hafoin Timor GAP, E.P halo preparasaun dokumentu legál no halo negosiasaun ho Kompañia fornesedór, konsege duni fornese no konklui ona.

“Ita husu fornesimentu mina iha faze daruak ne’e kumpre kalendáriu no tuir kontratu atubele garantia funsionamentu mákina sira iha sentrál elétrika sira,” nia akresenta.

Iha fornesementu dahuluk, EDTL, E.P garante eletrisidade lakan normál iha territóriu nasionál tanba kombusível ba sentrál elétrika Hera no Betano sufisiente.

Notísia relevante: EDTL-Timor GAP selebra akordu fornese kombustível iha sentrál elétrika Betano

Tuir kontratu, Timor GAP, E.P iha obrigasaun atu hatama litru millaun 32, ne’ebé antes ne’e hatama liuhosi empreza MATO hamutuk litru millaun 1,5 no empreza fornesedór Singapura, no agora litru millaun 16 resin, ne’ebé falta litru millaun 13 mak sei fornese tan iha setembru no outubru, no sei kompleta tan iha tinan oin.

Kombustível ne’e fornese diretamente hosi kompañia refineria hosi PetroChina Internationál (Singapore) Pte Ltd no Chevron iha Illa Jurong, ne’ebé tula ho ró dedikadu Glory Star iha loron 28 maiu no atraka iha Betano iha loron 04 juñu ho kustu millaun $8.

Entretantu, Timor GAP prontu atu asegura eletrisidade iha rai laran hodi sidadaun tomak bele asesu ho di’ak no hakarak apoiu Estadu liuhosi EDTL, E.P hodi fornese mina ho kualidade no tuir padraun internasionál, inklui halo mós intervesaun ho presu ne’ebé kompetetivu atu setór privadu sira hodi labele hasa’e presu tuir sira-nia hakarak no bele hamenus gastu hosi Estadu Timor-Leste.

Kontratu entre parte rua asina iha 20 maiu, hosi Vise-Presidente Refined Products Trading, PetroChina International (Singapore) Pte Ltd, Hu Wei Qiang, no Prezidente Konsellu Administrasaun no Prezidente Konsellu Administrasaun Timor GAP, Antonio de Sousa.

Nune’e, fornesimentu gazodutu ba sentrál elétrika Betano, hosi Timor GAP, hetan liuhosi kontratu ho PetroChina, hodi lori gazodutu 500PPM sulphur ho +/- 15,000 Kilolitru ba sentrál elétrika Betano.

Kontratu entre parte rua aliña ho objetivu empreza públika rua ba interese públiku, ne’ebé bazeia ba kontratu ne’e, Timor GAP, E.P sei fornese kombustível ba sentral elétrika Betano iha tinan-tolu nia laran, hahú hosi 2021 to’o 2023, ho kustu orsamentu millaun $59.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here